काठमाडौं : कोभिड महामारीका कारण सिर्जित समस्यामा मुलुक फसेको छ । एकै पटक रोग र भोक विरुद्ध जनता जीवनमरणको संघर्षमा छन् । तर, यही महामारीकै बीच प्रमुख प्रतिपक्षी दल नेपाली काँग्रेसलाई भने महाधिवेशनको चटारो लागेको छ ।
काँग्रेसले क्रियाशील सदस्यता बितरण कार्य शुरु गरिसकेको छ । क्रियाशील सदस्यता ५० प्रतिशत बढाउनेगरी फारम वडा तहमा पठाउने कार्य शुरु भएको छ । क्रियाशील सदस्यता वितरण कार्य शुरु भइरहँदा पार्टीभित्रको असन्तुष्टि पनि बढेर गएको छ । विशेषगरी सभापति शेरबहादुर देउवालाई फेरि पनि पार्टीमा कब्जा जमाउनेगरी पार्टी गतिविधि बढेको भन्दै बरिष्ठ नेता रामचन्द्र पौडेल र महामन्त्री शशांक कोइरालहरुले असन्तुष्टि जनाएका छन् ।
बिजय गच्छेदारले काँग्रेसमा पार्टी समाहित गरेपछि सभापति देउवा झनै शक्तिशाली भएको बुझाइका कारण असन्तुष्ट पक्षले पार्टी विधान बिपरीत निर्णय भएको आरोप लगाउँदै आएका छन् । समायोजन प्रक्रियामा एकमुष्ठ २५ हजार सदस्य गच्छेदारलाई दिने निर्णयले पार्टीभित्रका पुराना नेता कार्यकर्ता अन्यायमा परेको उनीहरुको आरोप छ ।
यस्तै विभाग संख्या २८ बाट बढाएर ४७ पु¥याउने र महाधिवेशन आउन केही महिना मात्रै बाँकी रहँदा विभागीय सदस्य मनोनयन अगाडि बढाइएको भन्दै असन्तुष्टि जनाएका छन् । काँग्रेस जेष्ठ मञ्चमा चार सय बढी मनोनयन गरेर देउवाले आफूलाई बलियो बनाएको बुझाइ असन्तुष्ट पक्षमा देखिएको छ ।
सँगै, आगामी महाधिवेशनबाट नेतृत्व दाबी गर्ने क्रम समेत देखिन थालेको छ । तर, यसपटक पनि १३औं महाधिवेशन जस्तै सभापति देउवा, बरिष्ठ नेता पौडेल र पूर्व महामन्त्री कृष्णप्रसाद सिटौलाबीच नै प्रतिश्पर्धा हुने अनुमान गरिएको छ । अहिलेसम्मको गतिविधिले पनि त्यस्तै देखाउँछ । यसबीच यसपटक पनि महामन्त्री कोइराला, सुजता कोइराला र शेखर कोइरालाले कोइराला परिवारको बिरासतको अजेण्डा उठाउने संभावना देखिन्छ । यसबाहेक अन्य नेताहरुले भने नेतृत्वमा हिम्मत गर्ने संभावना कमै छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies