कपिलवस्तु : प्रहरीले गौतम बुद्ध अन्तर्राष्ट्रिय विमानस्थलबाट १२५ ग्राम सुन बरामद गरेको छ ।
विमानस्थलको शौचालयमा बेवारिसे अवस्थामा दुईवटा सिक्री भेटिएको लुम्बिनी प्रदेश प्रहरी कार्यालयले जनाएको छ । शौचालयमा फेला परेको सुनसँगै रियाज अहमदको नाममा जारी भएको गोल्डेन स्टोन न्यू ज्वेलरीको बिल पनि फेला परेको छ । बरामद सुन आवश्यक कारबाहीको लागि गौतम बुद्ध विमानस्थल भन्सार कार्यालय भैरहवामा बुझाइएको छ ।
यसैबीच श्रीएयरमार्फत भैरहवाबाट काठमाडौं जान लागेका भारतीय नागरिक राहुल चतुर्वेदीको साथबाट ९ लाख २४ हजार ७ सय भारतीय रुपैयाँ, १ हजार अमेरिकी डलर र ९६० युएई दिरहम प्रहरीले बरामद गरेको छ । पक्राउ परेका चतुर्वेदीलाई आवश्यक कानूनी कारबाहीका लागि राजस्व अनुसन्धान कार्यालय बुटवलमा पठाइएको छ ।
