ट्रान्सपरेन्सी इन्टरनेशनलको रिपोर्ट सरकारले अस्वीकार गरेको छ । मन्त्रिपरिषद्को निर्णय सार्वजनिक गर्दै सरकारका प्रवक्ता एवम् सूचना, प्रविधि तथा सञ्चार मन्त्री पार्वत गुरुङले ट्रान्सपरेन्सी इन्टरनेशनलको रिपोर्ट अस्वीकार गरेका हुन् । उनले यो अध्ययन पूर्वाग्राही भएकाले अस्वीकार गरिएको जनाएका छन् । यसका नेपाल प्रमुख कुनै राजनीतिक दलमा आवद्ध भएकाले सत्तारुढ नेपाल कम्युनिष्ट पार्टी (नेकपा) र सरकारलाई बदनाम गराउने उद्देश्यले यो रिपोर्ट आएको प्रवक्ता गुरुङको भनाइ छ ।
अध्ययनमा सहभागी मध्ये ८४ प्रतिशतले भ्रष्टाचार बढेको भन्दै आएको रिपोर्टमा सत्यता नभएको तर्क गरेका छन् । ट्रान्सपरेन्सी इन्टरनेशनलले हालै सार्वजनिक गरेको रिपोर्टमा नेपाल दक्षिण एसियामै बढी भ्रष्टाचार हुने मुलुकमा परेको देखाएको थियो । विश्वभरमा नेपाल १२४ औं स्थानमा छ ।
रिपोर्टमा प्रधानमन्त्री केपी शर्मा ओलीको नामै किटेर भ्रष्टाचारीलाई जोगाउन खोजेको रिपोर्ट तयार पारेको थियो । सेक्युरिटी प्रिन्टिङ प्रेस खरीद प्रक्रियामा प्रधानमन्त्री ओली आफै तत्कालीन सञ्चार मन्त्री गोकुल बाँस्कोटाको बचाउमा लागेको उल्लेख गरिएको छ ।
यस्तै बालुवाटारको ललितानिवास जग्गा प्रकरण देखि वाइडबडी खरीदमा समेत प्रधानमन्त्री ओली आफै भ्रष्टाचारीलाई जोगाउनेतिर लागेको भन्दै ट्रान्सपरेन्सी इन्टरनेशनलले रिपोर्ट सार्वजनिक गरेको छ । तर, यो रिपोर्ट सरकारलाई अस्वीकार्य हुने तर्क मन्त्री गुरुङले गरेपछि आम वृत्तमा भने आफूलाई प्रतिकुल हुने निर्णय अस्वीकार गर्ने अनि राम्रो भनिदिएमा स्वीकार गर्ने प्रवृत्ति देखिएको टिप्पणी गरेका छन् ।
कुनै रिपोर्ट तयार पार्दा पूर्वाग्राही तरिका अपनाइएको हो भने त्यो गलत हो । किनभने मुलुकलाई बद्नाम गराउनेगरी कुनै रिपोर्ट तयार हुनुहुन्न । सँगै, सरकारको नेतृत्व गरिरहेकाहरुले विगतमा ट्रान्सपरेन्सी इन्टरनेशनलको रिपोर्टलाई देखाएर तत्कालीन सरकारका नेतृत्वमा रहेकालाई प्रश्न गर्ने, तर अहिले आफू नेतृत्वमा रहँदा भने यसलाई अस्वीकार गर्ने प्रवृत्ति हो भने त्यो पनि गलत हुन जान्छ ।
फेरि सरकारले कुनै संस्थाले गरेको रिपोर्टको प्रतिवाद गर्ने नभएर आफ्नो कार्यशैलीमा सुधार ल्याउन जरुरी हुन्छ । आम जनताले सरकारबारे कस्तो धारणा राखेका छन् र सुशासनमा कति ध्यान दिइएको छ भन्ने महत्वपूर्ण हुनेछ । तर, कोभिड महामारीबाट जनताको जीवन रक्षा गर्नुपर्नेमा उल्टै स्वास्थ्य सामग्री खरीदमा अनियमितता भएकोमा सरकारले नै छानबिन गरिरहेका छन् । तसर्थ, सरकारले भ्रष्टाचार अन्त्यकै लागि जोड दिनुपर्छ, कसैको रिपोर्टमा प्रतिवाद गर्ने होइन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies