काठमाडौं : प्रधानमन्त्री पुष्पकमल दाहाल प्रचण्डलाई भेट्न बालुवाटार पुगेका राष्ट्रिय स्वतन्त्र पार्टीका मन्त्रीहरू राजीनामा नबुझाई फर्किएका छन् । उनीहरूले प्रधानमनत्रीलाई जतिसक्दो छिटो विश्वासको मत लिन आग्रह गरेका थिए ।
समसामयिक राजनीतिक घटनाक्रमबारे छलफल गर्ने र प्रधानमन्त्रीको धारणापछि राजीनामा बुझाउने उनीहरूको तयारी थियो । तर छलफलपछि उनीहरुले राजीनामा नदिने बरू प्रधानमन्त्रीलाई बिश्वासको मतमा सघाउने निर्णय गरेका छन् । उनीहरूले जतिसक्दो छिटो संसदमा विश्वासको मतको आव्हान गर्न प्रधानमन्त्रीलाई आग्रह गरेर बालुवाटारबाट फर्किएका छन् ।
सरकारमा रास्वपाका सभापति रवि लामिछाने उपप्रधानमन्त्री तथा गृहमन्त्री छन् । यसैगरी उपसभापति डोलप्रसाद अर्याल श्रम, रोजगार तथा सामाजिक सुरक्षा मन्त्री, सुमना श्रेष्ठ शिक्षा मन्त्री र विराजभक्त श्रेष्ठ युवा तथा खेलकुदमन्त्री छन् ।
बुधबार नेकपा एमालेका मन्त्रीहरूले सामूहिक राजीनामा बुझाएपछि राजीनामाको तयारी गरेको रास्वपाले प्रचण्डलाई अन्तिमसम्म साथ दिने निर्णय गरेको छ ।
.jpg)
