काठमाडौं : श्रम, रोजगार तथा सामाजिक सुरक्षा मन्त्रालयमा श्रम स्वीकृतिका प्रक्रियामा वैदेशिक रोजगार व्यवसायीले झेलिरहेका प्राविधिक प्रकृतिका समस्या पहिलो चरणमा समाधान गर्ने विषयमा छलफल शुरु भएको छ । मन्त्रालयको रोजगार समन्वय महाशाखा प्रमुख सहसचिव हरिप्रसाद मैनालीको संयोजकत्वमा गठित ९ सदस्यीय कार्यदलको पहिलो बैठक बुधबार मन्त्रालयमा बसेको थियो ।
सहसचिव मैनालीसहित सरकारी प्रतिनिधिमा वैदेशिक रोजगार विभागका महानिर्देशक कुमारप्रसाद दाहाल, कानूनका उपसचिव रेशराज आचार्यसहित रहेका छन् भने व्यवसायीका तर्फबाट नेपाल वैदेशिक रोजगार व्यवसायी संघका अध्यक्ष विष्णुप्रसाद गैरे, महासचिव सुजित कुमार श्रेष्ठ, प्रगतिशील वैदेशिक रोजगार व्यवसायी मञ्च नेपालका अध्यक्ष रामप्रसाद भान्तना र नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र प्रसाद ढकाल सदस्य रहेका छन् ।
करिब दुई घण्टा चलेको बैठकमा समस्यालाई तत्कालीन, दीर्घकालीन गरी तीन वर्गमा राखेर छलफल गरी समाधान पहिल्याउने सहमति भएको छ । त्यसका लागि आगामी आइतबार वैदेशिक रोजगार विभागले सरोकारवाला पक्षसँग विभागमा गर्ने छलफलका निष्कर्षहरुलाई आधार बनाइने भएको छ ।
विभागले संघ, मञ्च तथा एसोसिएसनलगायतमा आवद्ध व्यवसायीहरुलाई सहभागी गराएर छलफल गर्ने मंगलबार निर्णय गरेको थियो । संघले राखेका मागका सम्बन्धमा छलफल गरी प्रतिवेदन दिन विभागले विभागका सूचना अधिकारी तथा निर्देशक टिकामणि नेउपानेको संयोजकत्वमा सात सदस्यीय कार्यदल गठन गरेको छ । कार्यदलमा संघको तीन जना प्रतिनिधित्व रहेको छ ।
मन्त्रालयकोे बुधबारको कार्यदल बैठकमा वैदेशिक रोजगार सूचना प्रणाली (फेमिस) को प्रयोगमा रहेका जटिलता हटाई सहजीकरण गर्ने सहमति भएको छ । व्यवसायीहरुले रोजगार विभागले परीक्षणका रुपमा प्रयोग गर्न शुरु गरेको प्रणालीको प्रावधान अनुसार कामदार छनोट गर्दा पटक–पटक विज्ञापन गर्नुपर्ने धेरै कठिनाईहरु रहेकोेले यसलाई परिमार्जन गर्नुपर्ने माग राख्दै आएका छन् ।
त्यसैगरी कोरोना भाइरस (कोभिड–१९) का कारण वैदेशिक रोजगारी गुमाई पाकेको तलव समेत नपाई आएका कामदारका उजुरी सुनुवाई गर्ने, तत्काल शाखा कार्यालय सञ्चालन गर्ने, अनुगमनलाई यथार्थपरक बनाउने र जापानको रोजगारी र घरेलु कामदार पठाउन एउटै लाइसेन्स बनाउने जस्ता विषयलाई तत्काल समाधान गर्नुपर्ने समस्याका रुपमा पहिचान गरिएको बैठक स्रोतले बतायो । स्रोतका अनुसार शाखा कार्यालय सञ्चलानका विषयमा विभागले केही दिनमै व्यवसायीहरुलाई सूचना गर्ने सम्भावना रहेको छ ।
कार्यदलले ऐन तथा नियमावली र सेवा शुल्क परिमार्जन गर्न राष्ट्रिय सहमति नै आवश्यक परी केही समय लाग्ने निष्कर्षका साथ ती समस्यालाई दीर्घकालीनरुपमा समाधान गर्नुपर्ने वर्गमा राखेको छ । व्यवसाय कोष सञ्चालन लगायतका विषय मध्यकालीनरुपमा समाधान गर्नुपर्ने वर्गमा राखिएको छ । वैदेशिक रोजगार व्यवसायीहरुले सरकारले फ्रि भिसा फ्रि टिकटको निर्णय लागू गरेयता समस्याहरु निरन्तर बढेको तर समस्याहरुको स्थायी समाधान गर्न मन्त्रालयको प्रशासनिक नेतृत्वले महत्व नदिएको गुनासो गर्दै आएका छन् । वर्तमान सचिव तोयम रायाले अन्योलको अवस्थामा रहेको वैदेशिक रोजगार क्षेत्रलाई सुरक्षित, मर्यादित र व्यवस्थित गर्न मन्त्रालयको स्तरबाट समाधान हुनसक्ने समस्या समाधान गर्न ढिला गर्न नहुने भन्दै मन्त्रालयको रोजगार समन्वय महाशाखा प्रमुख सहसचिव मैनालीको संयोजकत्वमा ९ सदस्यीय कार्यदल गठन गरेपछि व्यवसायीहरु उत्साहित भएका छन् ।
उक्त कार्यदलमा मन्त्रालयका पाँच र व्यवसायीका तर्फबाट चार जना सदस्य रहेका छन् । सचिव रायाले वैदेशिक रोजगारका क्षेत्रका ऐन, कानून, कार्यविधि तथा निर्देशिकाहरुमा एकरुपता र एक आपसमा तादम्यता मिलाउन कार्यदललाई निर्देशन दिएको स्रोतले बतायो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies