काठमाडौं : नेपाल वैदेशिक रोजगार व्यवसायी संघले कतारस्थित नेपाली दूतावासले मागपत्र प्रमाणीकरणका लागि पेश गर्दा नेपालका म्यानपावर कम्पनीलाई दिने सेवा शुल्कको प्रतिवद्धता पेश गर्न अनिवार्य गरेको विषयमा परराष्ट्र र श्रम, रोजगार तथा सामाजिक सुरक्षा मन्त्रालयलाई स्पष्ट पार्न माग गरेको छ ।
कतारस्थित नेपाली दूतावासले सोमबार एक सूचना जारी गर्दै नेपालबाट नयाँ कामदार माग गर्ने कतारका रोजगारदाता कम्पनीले नेपालका रिक्रुटमेन्ट एजेन्सी (मेनपावर कम्पनी) लाई उपलब्ध गराउनुपर्ने सेवा शुल्क (सर्भिस चार्ज) प्रदान गर्ने प्रतिवद्धता अनिवार्यरुपमा जनाउनु पर्ने भनेको छ ।
त्यसको भोलिपल्ट मंगलबार संघले व्यवसायीहरुसँग छलफल गरी त्यस विषयमा स्पष्ट पार्न दुई मन्त्रालयसँग बुझ्ने निष्कर्ष निकालेको थियो । छलफलको निष्कर्ष अनुसार बुधबार दुई मन्त्रालयमा पत्र लेखेर जानकारी लिने निर्णय गरिएको संघका अध्यक्ष बिष्णुप्रसाद गैरेले मध्यान्हलाई जानकारी दिए ।
दूतावासले आगामी मार्च १ देखि मागपत्र प्रमाणीकरण गर्दा उक्त नयाँ नियम लागू गर्ने बताएको छ । दूतावासले सो मितिदेखि सेवा शुल्क सम्बन्धी प्रतिबद्धता नभएको मागपत्र प्रमाणीकरण नगरिने बताएको छ । व्यवसायीहरुसँगको छलफलपछि आफुले कतारस्थित नेपाली राजदूत नारदनाथ भारद्वाजसँग त्यस विषयमा कुराकानी गरेर आगामी मार्च १ देखि दूतावासले मागपत्र प्रमाणीकरण गर्दा उक्त नयाँ नियम लागू नगर्न आग्रह गरेको अध्यक्ष गैरेले बताए ।
श्रम मन्त्रालयले वैदेशिक रोजगारीमा जाने कामदारको सेवा शुल्क रोजगारदाताहरुले व्यहोर्नुपर्ने र नेपालका म्यानपावर कम्पनीले रोजगारदाताहरुबाट सेवा शुल्क नपाएको अवस्थामा मात्र सेवा शुल्क वापत बढीमा दश हजार रुपैयाँ लिन पाउने प्रावधान कार्यान्वयन भइरहेको बेला वैदेशिक रोजगार मागपत्र प्रमाणीकरण निर्देशिकामा उल्लेख नभएको विषय कार्यान्वयनमा ल्याउँदा नेपाल आउने डिमाण्ड डाईभर्ट हुने खतरा रहेकोतर्फ पनि आफुले राजदूत भारद्वाजको ध्यानाकर्षण गराएको अध्यक्ष गैरेले बताए ।
जवाफमा राजदूत भारद्वाजले नेपालका म्यानपावर कम्पनीहरुले अनुचित प्रतिस्पर्धा गरी जथाभावी डिमाण्ड लैजाने र कामदारलाई दुःख दिने गरेको गुनासो बढेपछि दूतावासले नयाँ प्रवन्ध गरेको बताएका थिए । तर अस्वस्थ प्रतिस्पर्धाका लागि दूतावास जिम्मेवार रहेको र दूतावासले आफ्नो कार्यशैलीमा सुधार गर्नुपर्ने सुझाव दिएको अध्यक्ष गैरेले बताए ।
नेपालका म्यानपावर कम्पनीहरुले सेवा शुल्क वापत एक जना कामदारको दुई सय डलरसम्म पाउने गरेका छन् । तर सबै रोजगारदाताले सेवा शुल्क पठाउने गरेका छैनन् । रोजगारदाताले सेवा शुल्क नदिए म्यानपावर कम्पनीले कामदारबाट दश हजार रुपैयाँ उठाउँदै आएका छन्् । कतारसहित साउदी अरबका रोजगारदाताले बंगलादेशबाट कामदार मगाउँदा सेवा शुल्क नतिर्ने तर नेपालका लागि अनिवार्य वाध्यताले रोजगारदातालाई अनावश्यक रुपमा चिढाउने भन्दै व्यवासयीहरुले दूतावासको निर्णय सुन्दा कर्णप्रिय भएपनि कार्यान्वयनमा जटिल रहेको बताएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies