काठमाडौं : सरकारले भाषा परिक्षा उत्तीर्ण गरेका युवाहरुलाई रोजगारीका लागि दक्षिण कोरिया पठाउने विषयमा कूटनीतिक क्षमता देखाउन नसक्दा दश हजार बढी रोजगार आकांक्षी युवाहरु राजधानीमा अलपत्र परेका छन् । श्रम गरेर कमाउने समयमा उनीहरु कोरिया जाने वातावरण बनाउन माग गर्दै श्रम, रोजगार तथा सामाजिक सुरक्षा मन्त्रालयल देखि परराष्ट्र मन्त्रालय धाइरहेका छन् । उचित मापदण्डसहित कोरियाली रोजगार प्रक्रिया सुचारु गर्न माग गरेपनि एक वर्षयताको प्रयासमा ठोस् उपलब्धी पाउन नसकेको उनीहरुले बताएका छन् ।
मंगलबार वैदेशिक रोजगार विभागका नवनियुक्त महानिर्देशक कृष्ण प्रसाद दवाडीलाई भेटी ज्ञापनपत्र बुझाएका रोजगार आकांक्षी युवाहरुले आफुहरुलाई तत्काल रोजगारीका लागि दक्षिण कोरिया पठाउन माग गरे ।
नेपाल र दक्षिण कोरियाबीचको सम्झौता अनुरुप रोजगार अनुमति प्रणाली ईपीएस अन्तर्गत भाषा र सीप परीक्षण पास गरेका ८ हजारभन्दा बढी नियमित तथा २ हजारभन्दा बढी कमिटेड वर्गका युवाहरु कोरियाली रोजगारदाताको छनोटमा परेर पनि जान पाएका छैनन् । उनीहरुको श्रम सम्झौता भइसकेको छ ।
उनीहरु दक्षिण कोरिया जाने प्रक्रिया अन्तिम चरणमा प्रवेश गरेकाले उनीहरुले गत वर्ष फागुनदेखि हालसम्म अन्योलमा परेको बताएका छन् । कोरिया जान नपाएका युवाहरुले नेपाल सरकार र श्रम मन्त्रालयले यस विषयमा प्रभावकारी पहलकदमी नलिएको दाबी गर्दै कोरियाली रोजगार प्रक्रिया सुचारु गर्न उच्चस्तरी कुटनैतिक पहल गर्न माग गरेका छन् । पहल नगरेमा नेपाली युवाका लागि कोरियाली रोजगार अनिश्चित हुने उनीहरुको दाबी छ ।
कोरियाले जारी गरेको सीसीभीआई अन्तर्गत ९० दिनभित्र कोरिया पुगिसक्नुपर्ने प्रावधान छ । कोरोना संक्रमणपछि कोरिया एचआरडीले उक्त अवधि बढाएर ६ महिना अर्थात १ सय ८० दिन बनाइएको छ । प्रक्रिया अवरुद्ध भएको १४ महिनाभन्दा बढी समयमा पनि नेपाली युवाहरु दक्षिण कोरिया नपुग्दा धरैको प्रक्रिया रद्ध भएर रोजगारी गुमिसकेको ईपीएस पीडित संघर्ष समितिका संयोजक अजय सोडारीले मध्यान्ह राष्ट्रिय दैनिकलाई बताए ।
कोरोना भाइरस संक्रमण बढेपछि गत वर्ष चैतमा लकडाउन गर्नुभन्दा एक महिना अघि नै नेपालले कोरियामा संक्रमण बढेको भन्दै रोजगारीमा पठाउन एकतर्फी रुपमा बन्द गरेपछि छनोट भएका युवाहरु कोरिया जान रोकिएका हुन् । एक वर्षभन्दा बढी समय भौतारिँदा लाखौं रुपैयाँ ऋण लागेर डिप्रेसनको मुखमा पुगेको भन्दै उनीहरुले पछिल्ला दिनमा दुःखी, निरास र आक्रामक भएको बताएका छन् ।
‘कोरोना भाइरसका बाबजुद फिलिपिन्स, म्यानमार, भियतनाम, कम्बोडिया र श्रीलंका लगायतका देशबाट कमिटेड कामदार कोरिया प्रवेश गर्दा नेपाली किन रोकिए ?’ उनीहरुको प्रश्न छ ।
विभागका महानिर्देशक दवाडीले लामो समयदेखि रोकिएको कोरियाली रोजगार प्रक्रिया खुलाउने आफ्नो तर्फबाट सक्दो प्रयास गरिरहेको भन्दै कोरियन पक्षसँग निरन्तर संवाद गर्ने बताए । उनले कोरियाको रोजगार प्रक्रिया खुलाउन मन्त्रालयमा पनि छलफल गर्ने आश्वासन दिएका छन् । नेपालमा बढेको कोभिड–१९ को कारणले कोरियाले नेपाललाई हाल ‘मध्यम खालको खतराको’ सूचीमा राखेको छ । जसका कारण नेपाली कामदार जान समस्या आएको महानिर्देशक दवाडीको भनाइ छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies