काठमाडौं : ६० वर्षदेखि नेपालको औद्योगिक क्षेत्रमा लगानी गरिरहेको घराना हो, गोल्यान ग्रुप । टेक्सटायल (कपडा उद्योग)बाट व्यवसाय थालेको यो समूहले आफ्नो व्यवसाय विस्तार गर्दै आएको छ । साढे ६ दशकअघि रियलान्यस स्पिनिङ मिल्सबाट व्यवसाय सुरुवात गरेको गोल्यान ग्रुप अहिले स्थापित औद्योगिक प्रतिष्ठानमा पर्छ । यसले अहिले होटल, ऊर्जा, कृषि, अपार्टमेन्टदेखि बैंक तथा वित्तीय संस्थासम्म लगानी गरिरहेको छ ।
सन् १९६० को दशकको सुरुवातमा सोहनलाल गोल्यानलाई तत्कालीन राजा महेन्द्रले उद्योग सञ्चालनका लागि नेपालमा भित्र्याएका थिए । सोहनलालपछि गोल्यान समूहको नेतृत्व पवन गोल्यानले गर्दै आएका छन् । अहिले गोल्यान समूहमा पवनको छोरा अक्षय गोल्यान कम्पनीहरू नेतृत्व गर्दै छन् । त्यस हिसाबले नाति पुस्ताका ३७ वर्षीय अक्षय गोल्यानले ग्रुप सम्हाल्दै छन् । अमेरिका र दुवईबाट सन् २०१० मा नेपाल फर्किएपछि उनी विस्तारै व्यवसाय सम्हाल्न थालेका हुन् ।
अक्षय अहिले हजुरबुवाले सुरु गरेको रिलायन्स स्पिनिङ मिल्सको नेतृत्व गरेर नेपालको धागो भारतदेखि टर्कीसम्म पु¥याइरहेका छन् । ‘माटो’ नामक कृषि सामग्री उत्पादन र बजारीकरणसमेत गरिरहेको छ । सन् २०१८ देखि रिलायन्सको जिम्मेवारी सम्हालेका अक्षयले अहिले सिंगो गोल्यान समूहको जिम्मेवारी हेर्न थालेका छन् । उनी अहिले प्रबन्ध निर्देशकका रूपमा समूहका सबै क्षेत्र सम्हाल्न थालेका छन् ।
