काठमाडौं : पछिल्लो समयकी चर्चित गीतकार गीता गिरीले एकपछि अर्को सफलता चुम्दै गएकी छन् । गीत, कविता सिर्जनामा पोख्त उनका शब्दहरुमा देशका माटोहरु बोलिरहेका हुन्छन्, मान्छेहरुका भावनाहरु दौडिरहेका हुन्छन् । जाजरकोटमा जन्मे हुर्केकी गीता सानैदेखि कला साहित्य भनेपछि हुरुक्कै हुन्थिन् । भविष्यमा गीतकार नै बन्छु भन्ने एकरति पनि विश्वास उनलाई लागेको थिएन । कला क्षेत्रमै रुची भए पनि गीत लेखेर, रेकर्ड गरेर गीतकारको परिचय बनाउने सपना नदेखेको बताउने गीता संगीतकार राजु सिंहसँगको एक भेटका कारण आज आफू गीतकारको परिचय बनाउन सफल भएको बताउँछिन् ।
उनी भन्छिन्, ‘वरिष्ठ संगीतकार राजु सिंहसँगको त्यो भेट मेरा लागि एउटा बरदान नै सावित भयो । मैले जानेर या नजानेर कहिले काहिँ गीत, कविता लेख्ने गर्थें । राजु सरले मेरा गीतहरुलाई रेकर्ड गर्न र दर्शक स्रोता माझ लान सल्लाह सुझाव दिनुभयो । त्यसपछि मेरा शब्दहरुले प्राण पाए । कापीका पानाहरुमा थन्किरहेका मेरा गीतहरु आम मानिसहरुमाझ पुगे ।’
‘अधुरो मेरो जीवनकथा दैवले जुरायो, बाँच्ने रहर धेरै नै थियो यो गति गरायो’ उनले लेखेको पहिलो गीत हो । ‘हेरु हेरु लाग्छ मलाई जति हेरे पनि’ उनको पहिलो रेकर्ड भएको गीत हो । जसमा राजु सिंहको संगीत र एलिना चौहानको स्वर रहेको छ । उनले लेखेका एक दर्जनभन्दा बढी गीत विभिन्न गायक, गायिकाको स्वरमा रेकर्डिङ भइसकेका छन् । गीताको गीतमा एलिना चौहान, मिलन नेवार, धर्मेन्द्र सेवान, शिव परियारलगायतका चर्चित गायक, गायिकाले स्वर दिइसकेका छन् ।
काठमाडौंको पद्यमकन्या क्याम्पसमा पढ्दै गर्दा गीताका कविताहरु कलेजका कार्यक्रममा खुबै वाचन हुने गर्दथे । कलेजका साथीहरुले उनका कविताहरुमा नाटकमञ्चन पनि गर्थे । साहित्य प्रतियोगिताहरुमा भाग लिन हौसला प्रदान दिनेदेखि उनका हरेक साहित्यिक गतिविधिमा हौसला दिने गर्थे । उनको शुरुवाती यात्रा राष्ट्रिय लोक दोहोरी प्रतिष्ठान जिल्ला शाखा जाजरकोटबाट भएको थियो । जिल्लामा हुने हरेक गतिविधिमा उनको सक्रिय सहभागिता रहन्थ्यो । गाउन र नाच्न पनि उक्तिकै खप्पिस गीता हाल बेलायतमा बसेर नेपाली गीत संगीतलाई प्राण भरिरहेकी छन् ।
गायक उदितनारायण झा, प्रमोद खरेलका गीतहरु मन पराउने गीतालाई नेपाली गीत संगीतमा केही नयाँ कामहरु गर्ने इच्छा र चाहना रहेको छ । विषेशगरी गजल तथा आधुनिक गीत लेख्न मन पराउने गीतालाई सस्तो भाइरल भन्दा अमर सदाबहार कामहरु गर्न मन पर्छ । उनी भन्छिन्, ‘गीत संगीतमा नरमाउने सायद यो दुनियामा कमै होलान् । हामीले गीत संगीतलाई हलुकारुपमा लियौं भने यसको मर्म नै मर्छ । थोरै काम गर्ने यादगार काम गर्ने मेरो चाहना रहेको छ ।’
पछिल्लो समय समाजसेवामा पनि सक्रिय गीता विदेशमा बस्दा देशको मायाले धेरै नै सताउने बताउँछिन् । उनी भन्छिन्, ‘मनमा देश दुख्छ अनि सिर्जनाले मनलाई बहकाउँछ । मैले देश समाजलाई सम्झिएर लेखेका मेरा सिर्जनाहरु दर्शक स्रोता माझ ल्याउने तयारी गरीरहेको छु ।’
चलन चल्तीका गीतहरु पनि लेख्न मन पराउने गीतालाई नेपालको पोखरा, मुस्ताङ तथा जन्मठाउँ जाजरकोट मन पर्छ । कुनै दिन सक्रिय राजनीतिमा लागेर देश र जनताको सेवामा तल्लिन हुने इच्छा रहेको बताउने गीता पछिल्लो देशको अवस्थाले उदेक लागेको बताउँछिन् । उनी भन्छिन्, ‘देशका युवाहरु सबै विदेश पलायन भइरहेका छन् । सरकार र दलहरुसँग देश निर्माण गर्ने कुनै योजना छैन, कसरी देश बन्छ ?’
