दोहा, कतार : पर्वतको जलजला गाउँपालिकाबाट रोजगारी तथा विभिन्न सिलसिलामा कतार पुगेका जलजलावासीहरूको साझा संस्था पर्वत जलजला समाज कतारले तेस्रो वार्षिकोत्सव तथा दोस्रो अधिवेशन भव्य समारोहका बीच सम्पन्न गरेको छ । अधिवेशनको बन्द सत्रबाट जलजला गाउँपालिका–३, मल्लाज निवासी देभाराज कार्कीलाई पुनः अध्यक्षमा सर्वसम्मत चयन गर्दै नयाँ कार्यसमिति गठन गरिएको छ ।

नवनिर्वाचित कार्यसमितिको वरिष्ठ उपाध्यक्षमा सूर्यबहादुर खत्री तथा उपाध्यक्षमा अमरबहादुर जिसी र बेलबहादुर कार्की चयन भएका छन् । त्यसैगरी महासचिवमा बाबुराम नेपाली, सचिवमा दिनेश मल्ल, कोषाध्यक्षमा क्षेत्रबहादुर जिसी र सहकोषाध्यक्षमा कर्णबहादुर परियार चयन भएका छन् । सदस्यहरूमा लोकबहादुर खत्री, सन्दीप भण्डारी, फौदबहादुर कार्की, निलकण्ठ सुवेदी, रवि मल्ल, दिलबहादुर खत्री, रितबहादुर नेपाली, बुद्धिमान नेपाली र लालबहादुर क्षेत्री चयन भएका छन् ।

शुक्रबार कतारको प्लाजा मलस्थित मेस्काफे रेस्टुरेन्टमा आयोजित अधिवेशनको खुला सत्र समाजका अध्यक्ष देभाराज कार्कीको सभाध्यक्षता तथा ग्लोबल पर्वत समाजका मध्यपूर्व संयोजक रघुनाथ शर्माको प्रमुख आतिथ्यतामा सम्पन्न भएको हो । कार्यक्रममा कतारमा स्थापित विभिन्न सामाजिक संघसंस्थाका प्रमुख तथा प्रतिनिधिहरूको उल्लेख्य सहभागिता रहेको थियो ।

अधिवेशनसँगै आयोजित सांस्कृतिक समारोहले कार्यक्रमलाई थप आकर्षक र उल्लासमय बनाएको थियो । कतारमा रहेका दर्जनौँ नेपाली कलाकारले सांगीतिक प्रस्तुति दिँदा समारोह संगीतमय बनेको थियो। समाजका अग्रज व्यक्तित्वहरूका साथै संस्थासँग सहकार्य गर्दै आएका विभिन्न संघसंस्थालाई सम्मानसमेत गरिएको थियो । जलजलावासीहरूको साझा संस्थाको वार्षिकोत्सव भए पनि सहभागिता, व्यवस्थापन र सांस्कृतिक प्रस्तुतिका हिसाबले कार्यक्रमले जिल्लास्तरीय भव्य समारोहको झल्को दिएको थियो ।

कार्यक्रममा समाजको संस्थागत पहिचान र उद्देश्यबारे उठेको जिज्ञासालाई सम्बोधन गर्दै प्रमुख अतिथि शर्माले पर्वत जलजला समाज कतार कुनै अर्को संस्थाको समानान्तर वा प्रतिस्पर्धी संस्था नभएको स्पष्ट पारे । जलजला गाउँपालिकाका कतारमा रहेका बासिन्दाहरूको सक्रियतामा स्थापित यो विशुद्ध सामाजिक संस्था भएको उल्लेख गर्दै उनले सामाजिक हित र सेवाका लागि सबै संस्थासँग सहकार्य आवश्यक रहेको बताए ।

शर्माले समाजले एक कार्यकालमै ५० हजार कतारी रियालभन्दा बढीको आर्थिक कारोबार गर्न सफल हुनु आफैँमा सुखद उपलब्धि भएको उल्लेख गरे । संस्थाले सामाजिक सेवाका क्षेत्रमा देखाएको सक्रियताको प्रशंसा गर्दै उनले आगामी दिनमा पनि यस्ता गतिविधिलाई निरन्तरता दिनुपर्नेमा जोड दिए ।

अधिवेशनको खुल्ला शत्रको समापन गर्दै सभाध्यक्ष कार्कीले कार्यकालभरी सहयोग गर्ने सबैलाई धन्यवाद दिँदै उनले आगामी दिनमा कतारस्थित नेपाली संघसंस्थासँग समन्वय र सहकार्य गर्दै अघि बढ्ने प्रतिबद्धता जनाए । नेपालमा आइपर्ने प्राकृतिक विपत्ति तथा अन्य कठिन परिस्थितिमा समेत सबैसँग हातेमालो गरी सामाजिक सेवा र सहयोगका गतिविधिलाई निरन्तरता दिने बताए ।