काठमाडौं : कुमारी बैंकले साना उद्यमीहरुलाई वित्तीय सबलता प्रदान गर्ने उद्देश्यले क्यूआर कारोबारकै धितोमा क्यूआर मर्चेन्ट फोनलोन सुविधा संचालन गरेको छ ।
उद्यमीहरुले आफ्नो नजिक रहेको कुमारी बैंकका शाखाहरुमा आफ्ना व्यावसायको खाता खोली क्यूआर मार्फत् कारोबार गरेर सो सुविधा लिन सक्ने भएका हुन् । व्यवसायीहरुले प्रतिहप्ता कम्तीमा दुई व्यावसायिक कारोबारहरु लगातार ४ हप्ता भई मासिक कम्तीमा १० हजार रुपैयाँ बराबरको कारोबार उक्त बैंक खातामा हुँदा २ लाखसम्मको कर्जा कुनै पनि कागजात वा धितो बिना नै कुमारी बैंकको मोवाइल बैकिङ एप प्रयोग गरी सहजै लिनसक्ने बैंकले जनाएको छ ।
यसरी लिएको कर्जाको भुक्तानीको तरिका समेत उक्त एपमार्फत् नै गर्न सकिने भएकोले व्यावसायीहरुले कर्जा लिन तथा तिर्नका लागि बैंक जानु पर्ने छैन । यस सुविधाबाट साना उद्यमीहरु सहजै औपचारिक वित्तीय संयन्त्रमा आर्कषित हुने तथा उनीहरुको उद्यमशीलता प्रवद्र्धनमा केही टेवा पुग्ने विश्वास बैंकले लिएको छ ।
