काठमाडौं : प्रधानमन्त्री केपी शर्मा ओली र श्रम, रोजगार तथा सामाजिक सुरक्षा मन्त्री शरतसिंह भण्डारीसँग नेपालका लागि रोमानियाकी राजदूत डानियल मारियना सेजोनभ तानले आइतबार भेट गरिन् ।

सिंहदरबारमा भएको भेटमा प्रधानमन्त्री ओलीले कार्यकाल पूरा गरी आपसी सम्बन्धमा योगदान दिएकोमा राजदूतलाई धन्यवाद दिए । भेटमा दुुईपक्षीय हितका विविध विषय तथा सहयोग आदानप्रदानबारे छलफल भएको थियो । यस्तै दुवै देशमा आ–आफ्ना दूतावास खोल्न प्रस्ताव भएको थियो ।

भेटका अवसरमा नेपालका लागि रोमानियाका मानार्थ वाणिज्य दूत नारायण बजाज, परराष्ट्र मन्त्रालयका अधिकारीलगायतको सहभागिता रहेको थियो ।

श्रममन्त्री भण्डारीसँगको भेटमा राजदूत डानियलले श्रम सम्झौतापछि १९ हजारभन्दा बढी नेपालीको कामदार भिसा जारी गरेकोे जानकारी दिँदै नेपालीलाई औपचारिक माध्यमबाट पठाउने विषयमा जानकारी दिएको श्रम मन्त्रालयले जनाएको छ ।

मन्त्री भण्डारीले यसअघिको श्रम समझदारी कार्यान्वयनका लागि प्रोटोकल  निर्माण, मागपत्र प्रमाणीकरणमा सहजीकरण गर्नेलगायतका विषय संयुक्त प्राविधिक समितिबाट टुंगो लगाउने बताएको उनको निजी सचिवालयले जनाएको छ ।