विराटनगर : कोशी प्रदेशका मुख्यमन्त्री हिक्मतकुमार कार्कीले बहुमत पाएका छन् । बुधबार बसेको प्रदेश सभा बैठकमा उनले राखेको विश्वासको मतसम्बन्धी प्रस्तावको पक्षमा ६६ मत परेको छ ।
प्रदेश सभामा विपक्षमा १५ मत परेको छ । ८३ सांसद उपस्थित थिए । नेकपा एकीकृत समाजवादी भने मत विभाजनको प्रक्रियामा सामेल नै भएन ।
उनले प्रदेशसभामा राखेको विश्वासको मतको पक्षमा एमाले र कांग्रेसका सांसदहरूले मतदान गरेका हुन् । प्रदेशसभामा एमालेबाट उपसभामुख बाहेक ३९ र कांग्रेसका २९ सांसद छन् । दुई पार्टीको सांसद सङ्ख्या ६८ जनाको छ । यद्यपि मुख्यमन्त्री कार्कीलाई विश्वासको मत दिन सत्ता पक्षकै २ सांसद अनुपस्थित भए ।
बैशाख २७ मा संविधानको धारा १६८ को उपधारा ५ अनुसार मुख्यमन्त्री बनेका कार्कीले बैशाख ३१ मा विश्वासको मत लिएका थिए । तर माओवादी केन्द्रले १४ भदौमा सरकारलाई समर्थन गरेको समर्थन फिर्ता लिएपछि मुख्यमन्त्री कार्कीले आज पून विश्वासको मत लिएका हुन् ।
.jpg)
