अन्ततः मलेसियामा रोजगारीको बाटो खुलेको छ । विगत १५ महिनादेखि बन्द रहेको मलेसियाको रोजगारी नेपाली र मलेसियाली प्राविधिक कमिटीको बैठकले खुलाउने निर्णय गरेको हो । जसले गर्दा अब नेपाली कामदारहरुको मलेसियाको लागि फेरी रोजगारीको अवसर पनि खुलेको छ । अब नेपाली कामदारहरु आइतबारबाटै रोजगारीको लागि मलेसिया जान पाउने भएका छन् ।
श्रम, रोजगार तथा सामाजिक सुरक्षा मन्त्री गोकर्ण विष्टको निर्णयअनुसार २०७५ जेठ २ गते औपचारिक रुपमा मलेसिया रोजगारी बन्द भएको थियो । रोजगारीका लागि मलेसिया जाने कामदारमाथि अत्यधिक आर्थिक भार परेको भन्दै मन्त्री विष्टले मलेसिया रोजगारी बन्द भएको घोषणा गरेका थिए । त्यस यता नयाँ श्रम स्वीकृति लिएर नेपाली कामदार रोजगारीका लागि मलेसिया जान पाएका थिएनन् । अब भने लामो समयको अन्योल हटेको छ । नेपाली र मलेसियाली प्राविधिक कमिटीको तीन दिनसम्म लगातार रुपमा बसेको बैठकले मलेसियाको रोजगारी खुलाउने बारेमा सहमति गरेको हो । मलेसियन टोलीसँग नेपालका तर्फबाट श्रम, रोजगार तथा सामाजिक सुरक्षा मन्त्रालयका सहसचिव रामप्रसाद घिमिरेको नेतृत्वमा परराष्ट्र र कानुन न्याय तथा संसदीय मन्त्रालयका प्रतिनिधिसहित भएको वार्तामा १० वटा बुँदामा सहमति भएको छ ।
सहमति अनुसार पहिले नै पठाएको ढाँचामा कामदार पठाइने भएको छ । स्वास्थ्य परीक्षणका लागि भने पुरानै ३६ वटा स्वास्थ्य संस्थाहरु कायम रहको छ भने विस्तारै नेपाल सरकारले छनोट गरी सूचीकृत गरेका एक सय २२ वटा स्वास्थ्य संस्थामध्ये माथि उल्लेखित ३६ वटा बाहेक अन्यलाई पनि थप्दै लाने भएको छ । बाँकी स्वास्थ्य संस्थाहरुको अनुगमन भने मलेसियाले गर्नेछ । अब भने नेपाली कामदार कुनैपनि लागत नतिरी मलेसिया जान पाउनेछन् । कामदार लैजाने प्रक्रियाको सबै खर्च रोजगारदाता कम्पनी र मेडिकल खर्च पहिलो महिनाको तलब दिने समयमा रिफण्ड गरिने भएको छ । अब मलेसियन रोजगारदाताले आफूलाई आवश्यक परेको कामदारका लागि नेपाली दूतावासमा मागपत्र पेश गर्नेछन् । नेपाली दूतावासले प्रमाणीकरण गरेपछि वैदेशिक रोजगार विभागले आफ्नो वेबसाइटमा सो मागपत्र अपलोड गरी जानकारी गराउनेछ र कामदार लैजाने प्रक्रिया शुरु हुनेछ । यो वार्ता निर्णयक हुने हो की होइन भन्ने चासो सम्बन्धित सबैमा थियो ।
पूर्व निर्धारित वार्ताको तिथि एक दिन लम्ब्याएर भएपनि संयुक्त प्राविधिक कमीटीबाट मलेसिया रोजगारीको सकारात्मक परिणाम निकाल्ने जुन कौशलता प्रदर्शन भयो यसका लागि खासमा श्रम मन्त्री गोकर्ण विष्ट प्रशंसाका पात्र भएका छन् । उनले निःशुल्क रुपमा नेपाली कामदारलाई रोजगारीका लागि मलेसिया जाने जुन कशरत गरे त्यो नेपाली श्रमिकहरुले सम्झिरहने छन् ।
जे होस्, लामो समयको अन्योल हटेर नेपाली कामदार जान पाउने भएपछि सयौं कामदारहरुले अब मलेसियामा आफ्नो श्रम खर्च गर्न पाउने भएका छन् । निम्न वर्गीय नेपालीहरुले स्वदेशमा रोजगारी नपाएपछि विदेशिनुपर्ने बाध्यता एकातिर छ नै अर्कोतिर कम लागतमा जान पाउनुले नेपाली कामदारहरुलाई खुशी पनि ल्याएको छ । पठाएका कामदारको बारेमा सरकारले पनि नियमित अनुगमन गरी व्यवस्थित बनाउन जरुरी देखिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies