काठमाडौं : डा. बाबुराम भट्टराई नेतृत्वको नेपाल समाजवादी पार्टी (नेसपा)ले पार्टीको नाम र झण्डा परिवर्तन गरेको छ । कास्कीको पोखरामा सम्पन्न विधान अधिवेशनबाट पार्टीको नाम नेपाल समाजवादी पार्टी (नयाँ शक्ति) र संक्षिप्तमा नेसपा नयाँ शक्ति राख्ने निर्णय भएको हो ।
माओवादी केन्द्र छाडेर नयाँ शक्ति पार्टी बनाएका डा. बाबुराम भट्टराई अन्य दलसँगको एकतामा समाजवादी राखेर अगाडि बढ्न तयार भएका थिए । पछिल्लो समय नेपाल समाजवादी पार्टीको नाममा गतिविधि गर्दै आएका उनले मंगलबार पार्टीको नाममा ‘नयाँ शक्ति’ थपेका हुन् ।
यो पार्टीको सचिवालय बैठक पनि मंगलबार नै बसेको थियो । उक्त बैठकले महाधिवेशनमा प्रत्येक पार्टी सदस्यले प्रत्यक्ष मतदान गर्ने व्यवस्था गर्ने निर्णय अनुमोदन गरेको छ ।
महाधिवेशन आगामी माघ २५,२६ र २७ गते काठमाडौंमा गर्ने निर्णय भएको छ ।
अधिवेशनले पार्टीको केन्द्रीय समिति सदस्य ९९ जना, ११ सदस्यीय पदाधिकारी हुने व्यवस्था पारित गरेको छ । जसमा १ अध्यक्ष, ५ उपाध्यक्ष (१ महिला, १ जनजाति , १ मधेसी , १ खसाआर्य, १ दलित), १ महासचिव, ३ सचिव, १ कोषाध्यक्ष हुनेछन् ।
निर्वाचन समिति ३३ सदस्यीय हुनेछन् । सबै तहमा प्रत्यक्ष निर्वाचन प्रणालीबाट नेतृत्व चयनको व्यवस्था पारित गरिएको छ ।
पार्टीमा युवाको नेतृत्व स्थानीय तहमा ४० प्रतिशत, प्रदेशमा ३० र केन्द्रमा २० प्रतिशतको व्यवस्था गरिएको छ । त्यस्तै सबै समितिमा महिलापदाधिकारी ३३ प्रतिशतको व्यवस्था पनि विधानमा गरिएको छ ।
विधान अधिवेशनमा पार्टीको आयव्यय प्रस्तुत गरिएको थियो । आय ७ लाख ५० हजार र व्यय ९ लाख ७७ हजार १६० रुपैयाँ रहेको छ ।
