काठमाडौँ । नेपाली कांग्रेसका सहमहामन्त्री किशोरसिंह राठौरले नयाँ आएकाहरूलाई १० वर्ष पार्टी चलाएर देखाउन चुनौती दिएका छन् ।
सोमबार कांग्रेस क्षेत्रीय कार्यसमिति क्षेत्र नम्बर ३, रुपन्देहीले भैरहवामा आयोजना गरेको कार्यक्रममा राठौरले भने - ‘मै हुँ भन्ने नयाँ पार्टीले १० वर्ष पार्टी चलाएर देखाउन सकुन्, पार्टी चलाउन कस्तो हुन्छ भनेर बुझुन्, अहिलेको मै हुँ भन्ने नयाँ पार्टीले १० वर्ष पार्टी चलाएर देखाउन्’ ।
‘७० वर्ष नेपाली कांग्रेस चलाउनु, यहाँसम्म पुर्याउनु कति गर्नुपर्यो होला ? समीक्षा गर्नुस् । राणा, पञ्चायत र राजा फाल्यौँ । कम्युनिस्टहरूलाई राजनीतिक र लोकतान्त्रिक पद्धतिको मूल प्रवाहमा ल्याउन कांग्रेसलाई कति ग्राहो भयो भन्ने कुरा अहिलेको नयाँ पुस्ताले बुझ्न जरुरी छ, पुरानाले बुझेका छन्’ नेता राठौरले भने ।
कांग्रेसबाहेक कसैले जनताको पक्षमा काम गर्न नसक्ने उनको दाबी छ । मुलुकमा कांग्रेसको नेतृत्वमा संविधान जारी भएको भन्दै राठौरले यो सानो कुरा नभएको जिकिर गरेका छन् ।
