सल्यान : सल्यानमा यत्रु बोकेको फोर्स गाडीमा आगलागी भएको छ । बुधबार साँझ जिल्लाको बागचौर नगरपालिका-१ चौरपानीमा फोर्स गाडीमा आगलागी भएको लिल्ला प्रहरी कार्यालय सल्यानले जनाएको छ ।

थारमारे दार्मा जोड्ने सडक खण्डमा नेपालगञ्जबाट रुकुम पश्चिम चौफातर्फ जाँदै गरेको भे १ ख ३७५० नम्बरको फोर्स गाडीमा अचानक आगलागी भएको बताइएको छ । उक्त गाडी नेपालगञ्ज-४ का २९ वर्षीय चालक शंकर शाहीले चलाइरहेका थिए।

उक्त फोर्स गाडीमा भएको आगलागी नियन्त्रणमा नआएपछि गाडी पूर्णरूपमा जलेको छ । गाडीमा रहेका यात्रुहरूको सामान समेत जलेर नष्ट भएको जिल्ला प्रहरी कार्यालय सल्यानका सूचना अधिकारी रेशम बहादुर खत्रीले मध्यान्हलाई जानकारी दिए । यद्यपि, यस घटनामा कुनै मानवीय क्षति नभएको जनाइएको छ । उक्त गाडीमा २८ जना यात्रु सवार थिए ।

घटनास्थलमा इप्रका थारमारेबाट प्रहरी निरीक्षक दाम प्रसाद श्रेष्ठको नेतृत्वमा ८ जनाको प्रहरी टोली खटिएको छ । दुर्घटनाबारे थप अनुसन्धान भइरहेको प्रहरीले जनाएको छ ।