लिस्बन : राहदानीलगायतका कागजातसम्बन्धी समस्यामा परेका नेपालीलाई सेवा दिन माल्टामा घुम्ती सेवा शिविर सञ्चालन हुने भएको छ । शिविर सञ्चालन गर्न राहदानी विभाग काठमाडौं र स्पेनस्थित नेपाली दूतावासको संयुक्त टोली माल्टा जाने भएको छ ।

माल्टाको बिरकिरकरामा घुम्ती सेवा शिविर सञ्चालन गरेर राहदानी नवीकरणलगायतका कागजात प्रमाणीकरणसम्बन्धी कन्सुलर सेवा दिन टोली यही नोभेम्बर ३० तारिकमा माल्टा जाने दूतावासले जनाएको छ ।

राहदानी नवीकरणलगायतका कागजात प्रमाणीकरणसम्बन्धी समस्यामा परेका नेपालीलाई माल्टाबाटै सेवा प्रदान गर्ने उद्देश्यका साथ टोली पठाउन लागिएको स्पेनका लागि कार्यवाहक नेपाली राजदूत यज्ञराज पौड्यालले जानकारी दिए ।

टोलीले आगामी डिसेम्बर ४ तारिकसम्म माल्टामा रहेर विद्युतीय राहदानी (ई–पासपोर्ट)का लागि दरखास्त संकलन गर्ने तथा कागजात प्रमाणीकरणलगायतका कन्सुलर सेवा दिने कार्यवाहक राजदूत पौड्यालले बताए । पाँच दिनसम्म चल्ने उक्त शिविरमा तीन कर्मचारी खटिने उनले बताए ।

टोलीले राहदानीको म्याद सकिसकेको, राहदानीको म्याद एक वर्षभन्दा कम भएको, क्षति भएको, हराएको र माल्टामै जन्मेका नेपाली बालबालिकाको नयाँ राहदानीका लागि दरखास्त संकलन गर्ने तथा अन्य कन्सुलर सेवा प्रदान गर्ने जनाएको छ ।

विद्युतीय राहदानी (ई–पासपोर्ट)का लागि २५ नोभेम्बरभित्र अनलाइन आवेदन फारम भरिसक्न र शिविरबाट राहदानी नवीकरणलगायतका आवश्यक सेवा लिन आग्रह गरिएको छ । माल्टामा नेपाली दूतावास नभएका कारण विभाग र स्पेनस्थित नेपाली दूतावासको संयुक्त टोलीले त्यहाँ घुम्ती शिविर सञ्चालन गर्न लागेको हो ।