सुनसरी : सुनसरीको धरान उप–महानगरपालिका–१३ शिवधारास्थित कोशी लोकमार्गबाट सशस्त्र प्रहरीले मंगलबार करिब १९० किलो गाँजा बरामद गरेको छ ।
भेडेटारबाट धरानतर्फ आउँदै गरेको बा १० च ६८५२ नम्बरको सुजुकी कारको डिक्कीमा प्लाष्टिकले प्याकिङ गरी राखिएको अवस्थामा १९० किलो गाँजा सशस्त्र प्रहरी बल, नेपाल सुरक्षा वेश धरानले बरामद गरेको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए । चेकजाँचका लागि रोक्ने क्रममा चालक सडकमा कार छाडेर फरार भएको सशस्त्र प्रहरीले बताएको छ ।
सोही कारलाई पछ्याउँदै आएको को ३५ प २०४५ नम्बरको मोटरसाइलकमा सवार २ जनालाई पनि गाँजा तस्करीमा संलग्न रहेको आशंकामा नियन्त्रणमा लिइएको प्रहरीको भनाइ छ । बरामद गाँजा, कार, मोटरसाइकल र पक्राउ परेकाहरुलाई आवश्यक कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ ।
