काठमाडौं : संयुक्त राज्य अमेरिकामा सत्ता हस्तान्तरणको तयारी चलिरहँदा आप्रवासी समुदायमा रोजगार गुमाएर स्वदेश फर्किनुपर्ने त्रास बढेको छ । अमेरिकी राष्ट्रपतिमा निर्वाचित डोनाल्ड ट्रम्पले आगामी २० जनवरीदेखि कार्यकाल सम्हाल्दै छन् ।

विश्वविद्यालयहरूले ट्रम्प ह्वाइट हाउसमा फर्कनुअघि अन्तर्राष्ट्रिय विद्यार्थीहरूलाई घर फर्कन आग्रह गरिरहेका छन् । कलेज र विश्वविद्यालयहरूले अमेरिकी आप्रवासन नीतिहरूमा हुन सक्ने परिवर्तनको आँकलन गर्दै उक्त आग्रह गरेका हुन् ।

हाल अमेरिकामा ११ लाख २६ हजार ६९० अन्तर्राष्ट्रिय विद्यार्थीले अमेरिकी उच्च शिक्षा संस्थाहरूमा अध्ययन गरेका छन् । उनीहरूमध्ये अधिकाश रोजगारीमा छन् । राष्ट्रपतिमा निर्वाचित ट्रम्पले चुनावी अभियानमा उनीहरूका कारण अमेरिकीहरूले रोजगारी गुमाउनुपरेको भन्दै डेमोक्रेटिक पार्टीको चर्को आलोचना गरेका थिए ।

यसैबीच वर्तमान राष्ट्रपति जो बाइडेन प्रशासनले आफ्नो कार्यकालमा ११५ अवैधानिक हैसियतमा रहेका नेपालीलाई देश निकाला गरेको बताएको छ । उनीहरू ८० लाखदेखि १ करोडसम्म खर्च गरेर अवैधानिक रूपमा मेक्सिको हुँदै अमेरिका छिरेका बताइएको छ ।

नयाँ राष्ट्रपतिले कार्यकाल सुरु गरेपछि पहिलो आदेश नै आप्रवासीविरुद्धमा गर्ने अनुमान छ । त्यसपछि कागजात पूरा नगरेका धेरै नेपाली डिपोर्ट हुन सक्ने बताइएको छ ।