दोहा कतार : तमु (गुरुङ) समाज कतारको आयोजनामा शुक्रबार सम्पन्न हुने "सप्र्ही ल्हो ल्होसार" कार्यक्रममा आफ्नो सांगीतिक प्रस्तुति दिन नेपालबाट आमन्त्रित अतिथि कलाकारहरू कतार आइपुगेका छन् । आमन्त्रित कलाकारहरूमा हास्य कलाकार तथा जादुगर शेरबहादुर गुरुङ र लोक दोहोरी तथा कौडा चुड्का गायिका बबिता गुरुङ रहेका छन् । उनीहरू मगंलबार राति कतार आइपुगेका हुन् ।
कलाकारहरूलाई स्वागत गर्नका लागि समाज कतारकी अध्यक्ष टौमाया गुरुङलगायत कार्यसमितिका अन्य पदाधिकारीहरू हमाद अन्तर्राष्ट्रिय विमानस्थल पुगेका थिए । कलाकारद्वय गुरुङले ल्होसार कार्यक्रममा कतारवासी सबै नेपालीहरूलाई उपस्थितिका लागि अनुरोध समेत गरेका छन् । हरेक वर्ष पुस १५ मा मनाउँदै आएको ल्होसार यो वर्ष पनि मुप्रही ल्होलाई बिदाइ र सप्रही ल्होलाई स्वागत गर्दै मनाउन लागिएको हो ।
दोहाको अबुहमरस्थित आइडियल इन्डियन स्कुलको सभा हलमा शुक्रबार बिहान १० बजेदेखि कार्यक्रम सुचारु हुने तालिका रहेको छ । कार्यक्रममा सरिक हुन कतारका विभिन्न स्थानहरूबाट निःशुल्क यातायातको समेत व्यवस्था गरिएको छ । मध्यान्ह राष्ट्रिय दैनिक सप्र्ही ल्हो ल्होसार कार्यक्रमको सञ्चार सहयोगीका रूपमा रहेको छ ।
