अर्घाखाँची : जिल्ला प्रहरी कार्यालय अर्घाखाँची लगायत मातहतका जिल्लाका सम्पूर्ण प्रहरी युनिटले फरारको सूचीमा रहेका अभियुक्तलाई पक्राउ गर्न तदारुकता देखाएको छ । जिल्ला प्रहरी कार्यालय अर्घाखाँचीले गत साउनदेखि हालसम्म फरार अभियुक्त पक्राउ अभियान नै सञ्चालन गरेका कारण जिल्लामा अपराध गरी लुकिछिपी बसेका अभियुक्तहरु अहिले धमाधम पक्राउ परेका छन् ।
अर्घाखाँची प्रहरीले सर्च अप्रेशन सञ्चालन गरी विभिन्न मुद्दामा दोषी ठहर भइ फरारको सूचीमा रहेका ८४ जनामध्ये पुस १७ गतेसम्म १५ जनालाई विभिन्न स्थानबाट पक्राउ गरी कानूनी कारबाहीको दायरामा ल्याएको जिल्ला प्रहरी कार्यालय अर्घाखाँचीका प्रहरी नायब उपरीक्षक डीएसपी चक्रबहादुर मल्लले बताए ।
अर्घाखाँची प्रहरीले यस आर्थिक वर्षको साउनदेखि पुस १७ गतेसम्म जिल्ला प्रहरी कार्यालय तथा मातहतका युनिटहरुले अनुसन्धानको क्रममा फरार रहेका ८४ जनामध्ये फैसला कार्यान्वयनका लागि १५ जना फरार अभियुक्तलाई पक्राउ गरी झन्डै ११ लाख रुपैयाँ राजस्व समेत संकलन गरिएको डीएसपी मल्लले मध्यान्हलाई जानकारी दिए ।
पक्राउ परेका अभियुक्तसँग जिल्ला अदालतले तोकेको ११ लाख रुपैयाँ जरिवाना असुल प्रक्रिया अगाडि बढाइएको छ ।
त्यस्तै अदालतको फैसला अनुसार छत्रदेव गाउँपालिका वडा नम्बर ४ का केशव खनाललाई जिल्ला प्रहरी कार्यालय अर्घाखाँचीको टोलीले पक्राउ गरी ३ वर्ष कैद भुक्तानी बाँकी रहेका कारण सजाय भुक्तानको लागि जिल्ला कारागार पठाएको जिल्ला प्रहरी कार्यालय अर्घाखाँचीका सूचना अधिकारी बिष्णु प्रसाद पौडेलले बताए ।
यता प्रहरीले जिल्लामा हुने बालविवाह निरुत्साहित पार्न तदारुकता देखाएको छ । अर्घाखाँचीमा १२ वर्षीया बालिकाको विवाह गराएको आरोपमा अर्घाखाँची प्रहरीले सोमबार दुई जनालाई पक्राउ गरेको छ ।
ललाई फकाइ विवाह गराइदिने भूमिकास्थान नगरपालिका–९ की सकुन्तला सारु र विवाह गर्ने सन्धिखर्क नगरपालिका–८ का मुमाराम वि.क.लाई पक्राउ गरिएको हो ।
सकुन्तलाले काम लगाइदिने भन्दै १२ वर्षीय बालिकालाई घरमा बोलाएर मुमारामको जिम्मा लगाएको र त्यसपछि मुमारामले बालिकालाई सिन्दुर पहिराएर घरमा भित्र्याएको भन्दै बालिकाको आफन्तले जाहेरी दिएपछि उनीहरुलाई पक्राउ गरेको हो ।
बालविवाह सम्बन्धी जाहेरी परेपछि प्रहरीले घरमा छापा मारेर मुमारामलाई नियन्त्रणमा लिएको थियो । अदालतबाट म्याद थप गरी घटनाको अनुसन्धान जारी रहेको सूचना अधिकारी पौडेलले बताए ।
