नवलपरासी : पश्चिम नवलपरासीको पाल्हिनन्दन गाउँपालिका–१, रमपुरवा बड्की सुनरी पर्ने बाल शिक्षा निकेतन माध्यमिक विद्यालयको आफ्नै जग्गामा निर्माण गरिएको भवन २ वर्षदेखि प्रयोगविहीन अवस्थामा रहेको छ । ३६ लाख रुपैयाँको लागतमा निर्माण सम्पन्न भएपनि आवश्यक पूर्वाधार अभावका कारण भवन अझै सञ्चालनमा आउन सकेको छैन ।
विद्यालयका प्रधानाध्यापक सुनिल कुमार तिवारीका अनुसार विद्यालयमा विद्यार्थी संख्या बढ्दो रहेको छ । तर नयाँ भवन निर्माण भएपनि आवश्यक पूर्वाधार नहुँदा शिक्षण कार्य सञ्चालन गर्न कठिनाइ भइरहेको छ । भवन निर्माण सम्पन्न भएपनि पर्खाल लगाउन र भित्री संरचना पूर्ण बनाउन अझै बजेटको अभाव रहेको छ ।
विद्यालय व्यवस्थापन समितिका अध्यक्ष प्रदीप पटनावरका अनुसार विद्यालय भवनको करिब ७५ प्रतिशत निर्माण कार्य पूरा भइसकेको छ । बाँकी भित्री संरचना तथा पर्खाल निर्माण सम्पन्न गर्न अझै केही समय लाग्ने अनुमान गरिएको छ ।
विद्यालयको पुरानो भवनमा कक्षा कोठाको उचित व्यवस्थापन नभएपछि करिब २ किलोमिटर दूरीमा रहेको नयाँ जग्गामा भवन निर्माण कार्य थालिएको थियो । तर २ वर्ष बितिसक्दा पनि समस्या समाधान हुन सकेको छैन । विद्यालयमा प्राथमिक तहका कक्षाकोठामा डेक्स–बेन्चको अभाव यथावत छ भने खानेपानी र शौचालयको अवस्थासमेत दयनीय छ । तर सम्बन्धित निकायको पर्याप्त ध्यानाकर्षण हुन सकेको छैन ।
नयाँ भवन निर्माण गरिएको ठाउँमा गाउँपालिकाले फर्कला निर्माणका लागि ३० लाख रुपैयाँको बजेट विनियोजन गरेको छ भने प्रदेश सरकारले भित्री संरचना सम्पन्न गर्न १० लाख रुपैयाँ छुट्याएको छ । तर काम सुस्त गतिमा अघि बढ्दा भवन पूर्ण रूपमा प्रयोगमा ल्याउन कठिनाइ भइरहेको छ । विद्यालय प्रशासनका अनुसार स्थानीय तथा प्रदेश सरकारको समन्वय र शीघ्र बजेट व्यवस्थापन भएमा मात्र विद्यालयको नयाँ भवन विद्यार्थीका लागि उपयोगी बनाउन सकिन्छ ।
