दोहा कतार : स्या.स.स. हरिनास गाउँपालिका इकाई कतारले गृह जिल्लाका दुई फरक–फरक रोगबाट ग्रसित बिरामीको उपचारमा आर्थिक सहयोग गरेको छ ।
हेमटोलोजी (रगत सम्बन्धी रोग) को पाटन अस्पताल ललितपुरमा उपचार गराइरहेकी हरिनास गाउँपालिका वडा नं २ प्यार्सिङ ग्याब्दी निवासी देवबहादुरको छोरी वर्ष १८ की टेक माया थापाको उपचारार्थ २५ हजार रुपैयाँ नगद सहयोग गरेको छ ।
इकाईले अर्का बिरामी सोही गाउँपालिका वडा नं ४ राम्चे निवासी धर्मिन्द्र रानाको छोरा वर्ष १२ का ब्लड क्यान्सर पीडित सबिन रानाको उपचारमा २५ हजार रुपैयाँ नगद सहयोग गरेको छ ।
कान्ति बाल अस्पताल काठमाडौंमा उपचार गराइ रहेका रानालाई इकाईका प्रमुख सल्लाहकार प्रेमराज रिजालले अस्पतालमै पुगेर सहयोग हस्तान्तरण गरेका हुन् ।
दुवै बिरामीको उपचार खर्च महंगो र आर्थिक अवस्था न्यून भएको हुँदा इकाईले आर्थिक सहयोग उपलब्ध गराएको जनाएको छ ।
‘प्रवासबाट पनि हामी मातृभूमी र जिल्लाका हरेको दुःखमा साथमा छौं’इकाईका अध्यक्ष सोमप्रकाश मानन्धरले मध्यान्हसँगको कुराकानीमा बताए ।
उनले कतारमा रहेका हरिनास गाउँपालिका निवासी सबैलाई संस्थामा आबद्ध हुन र बिरामीलाई थप सहयोग गरी दिन पनि आग्रह गरेका छन् । करिब एक दशक अगाडी इकाईका रूपमा स्थापित हरिनास इकाई कतारमा रहेका अग्रणी सामाजिक संस्था भन्दा सक्रिय इकाईका रूपमा परिचित रहेको छ ।
