जुम्ला : संघीय सांसद बिनिता कठायतले हाम्रो समाजमा महिला र बालिकामाथि हुने शोषण र हिंसाका पक्षलाई उजागर गर्न आवश्यक रहेको बताएकी छन् ।
ग्रामीणमूखी युवा अभियान नेपाल (रोयम नेपाल) समन्वयमा जुम्लामा युवा मानव अधिकार रक्षक सञ्जालले आयोजना गरेको निर्वाचित जनप्रतिनिधि र सरोकारवालाबीचको अन्तरक्रिया कार्यक्रममा बोल्दै उनले भनिन्, ‘जुम्लाका बुहारी मात्रै होइनन्, छोरीहरू पनि पीडित छन् । यसले परिवारभित्रका संरचनात्मक असमानता र हिंसाका जटिल पक्षलाई जनाउ गरेको छ ।’
उनका अनुसार महिला र बालिकामाथि हुने यौन हिंसा र शोषणका घटनाहरू गम्भीर समस्या बनेका छन् । सांसद कठायतले समाजमा यस्ता समस्याहरूको गहिरो विश्लेषण र समाधान गर्न ध्यानाकर्षण भएको बताइन् ।
उनले छोरीलाई शिक्षा दिने कुरादेखि हरेक कुरामा घरपरिवारबाटै असहयोग हुने गरेको बताइन् ।
कार्यक्रममा चन्दननाथ ५ का वडाध्यक्ष बृखबहादुर कार्कीले मानव अधिकारको अवस्था र मानव अधिकार प्रवर्द्धन र संरक्षणका विषयमा सबै लाग्नुपर्ने बताए ।
त्यस्तै रोयम नेपालका कर्णाली प्रदेश संयोजक सन्तोष विकले मानव अधिकारको विषयमा बोल्न र काम गर्नको लागि अध्ययन शील, तटस्थ र निष्पक्ष हुनु पर्ने बताए ।
त्यस्तै युवा मानव अधिकार रक्षक सञ्जालका उपाध्यक्ष आशा न्यौपानेले मानव अधिकारको रक्षा गर्न हामी सबैको दाियत्व रहेको बताइन् ।
त्यस्तै सञ्जालका महासचिव दिपेन्द्र रावतले युवालाई स्वदेशमै रोजगारी उपलब्ध गराउन नसक्नु राज्यको ठूलो कमजोरी भएको टिप्पणी गरे ।
