.png)
स्वास्थ्य तथा जनसंख्या मन्त्रालयले बिहीबार सार्वजनिक गरेको रिपोर्टअनुसार एकैदिन कोरोना संक्रमणबाट पाँच जनाको मृत्यु भएको छ । एकैदिन मृत्यु भएको संख्या पछिल्लो समय उच्च हो । यसअघि संक्रमण दर नै सय भन्दा तल झरेको थियो । तर लगातार संक्रमणदर बढ्दै जाँदा मृत्यु हुने संख्या पनि बढेको छ । मृतक दर शून्य हुँदा महामारीबाट सामान्यकालको अपेक्षा गरेको थियो । कोरोनाविरुद्धको खोपको पहुँज सबै नागरिकमा बिस्तार गर्ने सरकारको लक्ष्यले पनि मुलुक सामान्यतर्फ उन्मुख हुने अनुमान गरिएको थियो । तर संक्रमणदर बढ्दै जाँदा मंगलबार संक्रमित संख्या हजार नाघ्यो । मंगलबार एकैदिन एक हजार ९० जनामा संक्रमण देखिएको थियो । बिहीबार संक्रमण हुनेको संख्या ८१५ जना छ ।
संक्रमण दर बढेकाले सक्रिय संक्रमित संख्या पनि बढेको छ । स्वास्थ्य मन्त्रालयको रिपोर्ट अनुसार, बिहीबारसम्म सक्रिय संक्रमित हुने संख्या ५,८६९ पुगेको छ । मन्त्रालयले खोप लगाउने संख्या पनि उच्च रहेको जनाएको छ । बिहीबार नै ३१ हजार ७६१ जनाले खोप लगाएको मन्त्रालयले जनाएको छ । खोपको मात्रा बढाएको रिपोर्ट भएपनि संक्रमित र मृत्यु हुनेको संख्याले भने उच्च सतर्कता अपनाउनुपर्ने देखिन्छ । मन्त्रालयले आगामी साता झनै चुनौतीपूर्ण हुने अनुमान गरेको छ भने भदौ महिनामा उत्कर्षमा पुग्ने अनुमान छ । तसर्थ सरकारले बुस्टर खोप लगाउन आग्रह गरिरहेको छ । सँगै, कोरोना संक्रमणबाट बच्ने उपाय अपनाउन आग्रह गरेको छ ।
नागरिकको जीवनरक्षाबारे सरकारको आलोचना आवश्यक ठाउँमा गर्न सकिएला । गरिएको पनि छ, आगामी दिनमा पनि हुनेछ । तर अहिले भने कोरोना संक्रमणबाट सतर्कता नागरिक आफैले अपनाउन आवश्यक छ । किनकि नागरिकले अपनाउने सतर्कताकै आधारमा कोरोना भर पर्नेछ । बितेका वर्षहरुमा महामारीका कारणले सहनु परेको पीडा र संकट सम्झेर पनि अहिले उच्च सतकर्ता अपनाउनुपर्छ । महामारीकै कारण मुलुकले लामो समय देशब्यापी लकडाउन र निषेधाज्ञा खेप्नु परेको थियो । यसबाट आर्थिक, शैक्षिक तथा मानवीय संकट खेप्दा अहिले पनि मुलुक सामान्य अवस्थामा फर्कन सकेको छैन । अझ सम्भावित विश्वव्यापी आर्थिक संकटबाट जोगिन पनि हामीले अहिले कोरोना महामारीबाट उच्च सतर्कता अपनाउन आवश्यक छ । सरकारले पनि महामारीबाट नागरिकको जीवन रक्षालाई प्राथमिकतामा राख्नुपर्नेछ ।
