दोहा कतार : पाठेघरको क्यान्सर रोगबाट ग्रसित पर्वतको जलजला गाउँपालिका वडा नम्बर ७ धाइरिङकी ५५ वर्षीया गंगा दमाईको उपचारका लागि कतारबाट थप सहयोग प्राप्त भएको छ । कतारमा रहेका परियारहरूको साझा सामुदायिक संस्था परियार मित्रता समाज कतारले २१ हजार ८ सय २१ रुपैयाँ बिरामी गंगालाई सहयोग गरेको हो ।
समाजका अध्यक्ष सुमन नेपालले प्रारम्भिक चरणमा बिरामीको उपचारमा सानो भए पनि इँटा थपियोस् भन्ने हेतुले सहयोग रकम पठाइएको र आवश्यक परेमा थप सहयोग पनि गरिने बताए । हाल बिपी कोइराला क्यान्सर अस्पतालमा उपचार गराइरहेकी दमाईको उपचारमा ठुलो रकम खर्च भई सकेको छ ।
ऋण र दाताहरूबाट प्राप्त रकमले बिरामीको उपचार भइरहे पनि ऋण दिने व्यक्ति समेत कोही नभएको बिरामीको छोरी अनिता परियारले मध्यान्हसँगको कुराकानीमा बताइन् । बिरामीलाई सहयोग गर्न चाहनेले बिरामीको छोरी अनिता दर्जीको एनएमबि बैंकको खाता नम्बर १२१०२००९४१७००१२ वा राष्ट्रिय वाणिज्य बैंकको खाता नम्बर ३५००१००००००४१२०३ मा सहयोग गर्न सकिने व्यवस्था गरिएको छ ।
