काठमाडौं : देशका विभिन्न स्थानमा भएका दुर्घटनामा दश जनाको मृत्यु भएको छ ।
प्रहरीको केन्द्रीय प्रहरी समाचार कक्षका अनुसार मोरङको बेलबारी नगरपालिका–४, बेतनास्थित सडकमा को.१ ज ३३९९ नम्बरको म्याजिक भ्यानको ठक्करबाट ६५ वर्षीय लक्षुराम राईको मृत्यु भएको हो ।
ठक्करबाट गम्भीर घाइते भएका राईको उपचारको क्रममा कोशी अस्पताल, विराटनगरमा मृत्यु भएको हो । साथै, घाइते एक जना पैदलयात्रीलाई आर्या न्यूरो अस्पताल, विराटनगर रिफर गरिएको छ । म्याजिक भ्यान चालकलाई प्रहरीले नियन्त्रणमा लिएको छ ।
गुल्मीको मुसिकोट नगरपालिका–४, दजाकोटस्थित सडकमा सुदूरपश्चिम प्रदेश.१–००१ ज १३८५ नम्बरको फोर्स गाडी अनियन्त्रित भइ सडकबाट करिब ३ सय मिटर तल खसेर दुर्घटना हुँदा ४५ वर्षीय रविन कुमार श्रीसको मृत्यु भएको छ ।
गाडीमा सवार रहेका ५ जनामध्ये ३ जनालाई लुम्बिनी मेडिकल कलेज, पाल्पा र २ जनालाई बुटवल प्रालि अस्पताल, बुटवल रिफर गरिएको छ । दुर्घटनामा गम्भीर घाइते भएका श्रीसको जिल्ला अस्पताल तम्घासमा उपचारका क्रममा मृत्यु भएको हो ।
रूपन्देहीको बुटवल उपमहानगरपालिका–५, तिनाउ पुलस्थित सडकमा लु.३ च २४८० नम्बरको बोलेरो जिप अनियन्त्रित भइ दुर्घटना हुँदा चालक ३२ वर्षीय हरी न्यौपाने, जिपमा सवार ७१ वर्षीय तिलक राम खनाल र ६७ वर्षीया गोरी खनालको मृत्यु भएको छ । दुर्घटनामा गम्भीर घाइते भएका सबैको उपचारका क्रममा लुम्बिनी प्रादेशिक अस्पताल बुटवलमा मृत्यु भएको प्रहरीले जानकारी दिएको छ ।
बागलुङको गलकोट नगरपालिका–३, भैसेको पुलस्थित सडकमा ध.१ त १९२ नम्बरको ट्याक्टर अनियन्त्रित भइ दुर्घटना हुँदा चालक २४ वर्षीय टेक बहादुर विकको मृत्यु भएको छ । दुर्घटनामा गम्भीर घाइते भएका उनको नगर अस्पताल, गलकोटमा उपचारको क्रममा मृत्यु भएको हो ।
सिन्धुलीको दुधौली नगरपालिका–१, कुर्थौलीस्थित सडकमा हाल नम्बर नखुलेको मोटरसाइकलको ठक्करबाट ३ वर्षीय आयुष माझीको मृत्यु भएको हो । दुर्घटनामा गम्भीर घाइते भएका आयुषको केएमसी अस्पताल, सिनामंगल काठमाडौंमा उपचारको क्रममा मृत्यु भएको हो । मोटरसाइकल चालक हाल फरार रहेको र प्रहरीले उनको खोजी गरिरहेको छ ।
रामेछापको खाडाँदेवी गाउँपालिका–६, माकादुमस्थित सडकमा ना.६ त ७८२४ नम्बरको ट्याक्टर अनियन्त्रित भइ सडकबाट २ सय मिटर तल खसेर दुर्घटना हुँदा चालक ३७ वर्षीय खिल बहादुर भुजेलको मृत्यु भएको हो । दुर्घटनामा गम्भीर घाइते भएका उनको मन्थलीस्थित अस्पतालमा उपचारको क्रममा मृत्यु भएको हो ।
त्यस्तै, नवलपरासी पश्चिमको सुनवल नगरपालिका–९ स्वाठी बस्ने २३ वर्षीय प्रदिप चौधरीको करेन्ट लागेर शुक्रबार मृत्यु भएको छ । सोही नगरपालिका–१२ त्रिनेत्र टोलस्थित बिजुलीको पोलमा स्मार्ट वाइफाइको तार मर्मत गर्ने क्रममा करेन्ट लागेर गम्भीर घाइते भएका उनको जिल्ला अस्पताल परासीमा उपचारको क्रममा मृत्यु भएको हो ।
धनुषाको कमला नगरपालिका–७ हथमुण्डास्थित कमला खोलामा डुबेर सोही ठाउँ बस्ने ३५ वर्षीय राम कुमार महतोको शनिबार मृत्यु भएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
