रौतहट : जुवातास  खेल्दै गरेको अवस्थामा ४ जना पक्राउ परेका छन् । जिल्लाको गौर नगरपालिका ५ मा रहेको स्थानीय सुरज कुमार घिमिरेको घरबाट प्रहरीले बिहान उनीहरूलाई नियन्त्रणमा लिएको हो ।

पक्राउ पर्नेमा ३३ वर्षीय जितेन्द्र कुमार कुशवाहासहित ४ जना छन् । विशेष सूचनाका आधारमा खटिएको टोलीले उनीहरूलाई पक्राउ गरेको प्रहरीले बताएको छ ।

उनीहरूको साथबाट नगद २८ हजार ७१५ समेत बरामद गरिएको प्रहरीले जनाएको छ । घटनाबारे थप अनुसन्धान भइरहेको जिल्ला प्रहरी कार्यालय रौतहटले बताएको छ ।

जिल्ला प्रहरी कार्यालयले गैरकानूनी गतिविधि रोक्न निरन्तर निगरानी गरिरहेको हो । प्रहरीका अनुसार समाजमा शान्ति सुरक्षा कायम गर्न र अपराध न्यूनीकरणका लागि यस्ता गतिविधिमा संलग्न व्यक्तिहरूमाथि कडा कारबाही गर्ने नीति लिइएको प्रहरी नायब उपरीक्षक दिपक कुमार रायले बताए ।