काठमाडौं : यस वर्षको मनसुनका कारण आएको बाढी र पहिरोले ३८१ सडक, पुल र अन्य पूर्वाधारमा क्षति पुगेको छ ।
सोमबार राष्ट्रिय विपद् जोखिम न्यूनीकरण तथा व्यवस्थापन प्राधिकरणले पत्रकार सम्मेलन गरी सातै प्रदेशमा साना–ठूला गरी पुगेको क्षतिबारे जानकारी दिएको हो ।
प्राधिकरणका सहसचिव डा.भीष्मकुमार भुसालले बाढीले सबैभन्दा धेरै वागमती प्रदेशमा क्षति पु¥याएको बताए । उनका अनुसार १७४ सरकारी भवन र ऊर्जा तथा जलस्रोतका २,०१९ आयोजनाको पुनःनिर्माण आवश्यक देखिएको छ । विपद् न्यूनीकरण तथा व्यवस्थापन राष्ट्रिय परिषद्को १६ औँ बैठकले सातै प्रदेशमा क्षतिग्रस्त संरचनाको पुनःनिर्माणका लागि इन्जिनियरहरू खटाउने निर्णय पनि गरेको छ ।
प्राधिकरणका अनुसार पुनःनिर्माणका लागि कार्यविधि स्वीकृत भइसकेको छ । निजी आवास पुनःनिर्माणका लागि आवश्यक प्रक्रिया २ माघदेखि लाभग्राहीसँग सम्झौता गरी थालिनेछ ।
बैठकले पोष्ट डिजास्टर रिकभरी योजनापनि पारित गरेको छ । यो योजनामा पोषण, स्वास्थ्य, शिक्षा, र स्वच्छता जस्ता विषयलाई समेटेर विपद्पछि पुनःस्थापनाको कार्यलाई प्राथमिकता दिनेछ ।
सहसचिव भुसालले विपद्का समयमा सूचना तथा सञ्चार व्यवस्थापन कमजोर हुँदा क्षति थपिएको स्वीकार्दै यसलाई सुधार्न सूचना तथा सञ्चार योजना कार्यान्वयन गरिने बताए । सरकारले विपद् संवेदनशील सामाजिक सुरक्षा तथा राहत वितरण मापदण्ड पनि जारी गरेको छ ।
जसमा विस्तृत आंकलन (डिडिए) हुन बाँकी छ । ती क्षेत्रमा सोही दिनदेखि प्रक्रिया अघि बढाइनेछ । पुनःनिर्माणका लागि सडक, यातायात, सरकारी भवन, शहरी पूर्वाधार, विद्युत्, वैकल्पिक ऊर्जा, सिंचाइ, स्वास्थ्य संरचना र पुरातात्विक संरचनालाई प्राथमिकतामा राखिएको छ ।
