.jpg)
काठमाडौं : काठमाडौं महानगरपालिकाले नेपालस्थित चिनियाँ दूतावासलाई ठमेलमा नयाँ वर्षको कार्यक्रम गर्ने अनुमति दिन अस्वीकार गरेको छ ।
दूतावासले ठमेलमा चिनियाँ नयाँ वर्षको कार्यक्रम गर्न महानगरसँगअनुमति मागेको थियो । तर, महानगरले ट्राफिक व्यवस्थापन भद्रगोल र सडक अस्तव्यस्त हुने भन्दै ठमेलमा कार्यक्रम गर्न दूतावासलाई अनुमति दिन अस्वीकार गरेको हो ।
मेयर बालेन साहको स्वकिय सचिव भूपदेव साहले ‘स्प्रिङ फेस्टिबल’ र नयाँ वर्षको कार्यक्रमको लागि दूतावासबाट ठाउँको लागि अनुमति मागेपनि महानगरले अनुमति नदिएको बताए ।
महानगरले कलंकीदेखि महाराजगन्जको बाटोमा कार्यक्रम गर्न दूतावासलाई अनुरोध गरेको छ ।
दूतावासले एकसाता अघि नै महानगरलाई पत्राचार गर्दै चिनियाँ नयाँ वर्षको अवसरमा २६ जनवरीदेखि २५ फेब्रुअरीसम्म एक महिना ठमेलमा कार्यक्रम गर्न अनुमति मागेका थिए ।
चीनले २९ जनवरीमा नयाँ वर्ष मनाउँछ । यही सन्दर्भमा चिनियाँ दूतावासले ठमेल क्षेत्रमा एक महिना लामो कार्यक्रम आयोजना गर्न अनुमति मागेको थियो ।
साथै, महानगरलाई सहआयोजक बस्न समेत प्रस्ताव गरेको थियो । तर दूतावासको दुवै प्रस्ताव महानगरले अस्वीकार गरेको छ ।
चक्रपथ सुधार आयोजनाअन्तर्गत चिनियाँ कम्पनी साङघाई कन्सट्रक्सनले चक्रपथ विस्तारको ठेक्का लिएको छ । तर, ठेक्का लिएको वर्षौं बितिसक्दा पनि काम नगरेको र सडक धुलाम्मे बनाएको भन्दै महानगर आक्रोशित छ ।
काठमाडौं महानगरले कलंकी–महाराजगञ्ज सडक विस्तारको काम आफूले नभई नेपाल सरकार चिनियाँ निर्माण कम्पनीले गरिरहेको सूचना लेखेर बोर्ड नै टाँसेको थियो । उक्त बोर्ड सडक विभागले हटाएको थियो ।
आफ्नो देशमा २४ घण्टामा पूर्वाधार निर्माण गरिसक्ने चीनले नेपालमा भने वर्षौंसम्म काम नगर्ने चिनियाँ प्रवृतिप्रति मेयर बालेनले व्यंग्य गरेका थिए । उनले चिनियाँ राजदूतसँगै चक्रपथ क्षेत्र अवलोकन गरेको बताउँदै उनैलाई प्रश्न गरेका थिए ।
चीन सरकारले वाचाअनुसार काम नगरेको भन्दै महानगरले चीनलाई ठमेलमा नयाँ वर्षका लागि कार्यक्रम गर्ने अनुमति नदिएको बताइएको छ ।
