काठमाडौं : खोटाङ र ओखलढुङ्गा जिल्ला प्रमुख जिल्ला अधिकारीविहीन भएको छ । यी दुई जिल्लामा प्रमुख जिल्ला अधिकारी नहुँदा सेवाग्राहीले मार खेपेका छन् । खोटाङका प्रमुख जिल्ला अधिकारी शिवकुमार कार्की र ओखलढुङ्गाका प्रमुख जिल्ला अधिकारी नारायण ढकालको अनिवार्य अवकाश भएपछि अर्को प्रमुख जिल्ला अधिकारी आएको छैन ।
खोटाङका प्रमुख जिल्ला अधिकारी कार्की १५ माघदेखि जिल्ला छाडेका हुन् । उनी शनिबार अनिवार्य अवकाशमा जाँदैछन् । कार्की गएपछि अधिकृत हिराधन राईले निमित्तको कार्यभार सम्हालिरहेका छन् ।
यस्तै ओखलढुङ्काका प्रमुख जिल्ला अधिकारी ढकाल पनि ९ माघदेखि जिल्ला छाडेका हुन् । उनी १६ माघमा अनिवार्य अवकाशमा गएका हुन् । ओखलढुङ्गामा अनुप पौडेलले निमित्त चलाइरहेका छन् ।
दुवै जिल्लामा प्रमुख जिल्ला अधिकारी नहुँदा मुद्दाका काम, महत्वपूर्ण निर्णय तथा टिप्पणीलगायतका काम प्रभावित बनेको हो ।
