काठमाडौं : राष्ट्रिय सूचना प्रविधि केन्द्रका तत्कालीन कार्यकारी निर्देशक सुनिल पौडेलविरुद्ध अर्को भ्रष्टाचार मुद्दा दायर भएको छ । सुरक्षा उपकरण किन्दा घुस लिएको निष्कर्षसहित सुनील र दीपक आनन्दविरुद्ध अख्तियारले भ्रष्टाचार मुद्दा गरेको हो ।
राष्ट्रिय सूचना प्रविधि केन्द्रद्वारा आर्थिक वर्ष २०७४/७५ मा सुरक्षण सामग्री खरिदका क्रममा तत्कालीन कार्यकारी निर्देशक पौडेलसहितले भ्रष्टाचार गरेको भन्ने उजुरीका आधारमा छानबिनपछि विशेष अदालतमा मुद्दा दायर गरिएको अख्तियारले जनाएको छ ।
अख्तियारले पौडेल र नेपालका लागि एफ फाइभ कम्पनीका प्रतिनिधि भारतीय नागरिक दीपक आनन्दको मिलेमतोमा राष्ट्रिय सूचना प्रविधि केन्द्रलाई आवश्यक सुरक्षण उपकरण खरिदका क्रममा आफैंले प्राविधिक मूल्यांकन गरी सेटिङमा ठेक्का लगाएको ठहर गरेको छ ।
बोलपत्रदाताका रूपमा दुवैले पूर्वयोजनाअनुसार सुरक्षण उपकरण खरिदको ठेक्कामा सुनील पौडेललाई त्यसबेला ३ करोड ८ लाख ५० हजार ४०० रुपैयाँ दिइएको खुलेको छ । त्यसबेला पौडेलले अमरिकी डलरमा २८ हजार घुस लिएको अख्तियारको अनुसन्धानले देखाएको छ । पौडेलले ठेक्का सदर भएको अस्ट्रल कम्प्पुटर्स नेपालबाट कमिशनका रुपमा ५.७२ प्रतिशतसमेत गरी जम्मा १२ करोड ८२ लाख ४० हजार भुक्तानी दिएको पनि खुलेको छ ।
उक्त रकम पाएपछि प्रतिवादी दीपक आनन्दले पौडेललाई ३ करोड ८ लाख ५० हजार ४ सय रुपैयाँ घुस पठाएको अख्तियारले जनाएको छ ।
त्यहीकारण दुवैजनाले भ्रष्टाचार निवारण ऐन, २०५९ को दफा ३ अन्तर्गतको कसूर गरेकाले भ्रष्टाचार मुद्दा चलाइएको हो । पौडेललाई भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा ३ करोड ८ लाख ५० हजार ४०० कायम गर्दै मुद्दा चलाइएको छ ।
पौडेलले भ्रष्टाचार निवारण ऐन, २०५९ को परिच्छेद २ (भ्रष्टाचारको कसुर र सजाय सम्बन्धी व्यवस्था) अन्तर्गतका कसुस गरेकाले भ्रष्टाचार निवारण ऐन, २०५९ को दफा २४ बमोजिम थप सजाय पनि माग गरिएको छ ।
उता भारतीय नागरिक आनन्दलाई भ्रष्टाचार निवारण ऐन, २०५९ को दफा ३ को उपदफा (३) बमोजिमको कसुरमा बिगो ३ करोड ८ लाख ५० हजार ४०० कायम गरी मुद्दा चलाइएको अख्तियारले उल्लेख गरेको छ ।
