दोहा कतार : प्रवासी भुजेल समाज कतारले बृहत् रक्तदान कार्यक्रमको आयोजना गर्ने भएको छ । नेपाली रक्तदाता संघ कतारसँगको समन्वय तथा कतारको सरकारी हमद अस्पतालसँगको सहकार्यमा रक्तदान कार्यक्रमको आयोजना गर्न लागेको हो ।
“रक्तदान, जीवनदान हाम्रो विश्वव्यापी अभियान, जहाँ नेपाली त्यहाँ रक्तदान” भन्ने मूल नारालाई अंगीकार गर्दै समाजले यही आउँदो फेब्रुअरी २१ तारिक शुक्रबार रक्तदान कार्यक्रम सम्पन्न गर्ने गरी तयारीलाई तीव्रता दिएको समाजले जनाएको छ । 'आफूले पनि रक्तदान गरौं, अरूलाई पनि रक्तदान गर्न प्रेरित गरौं, हाम्रो सानो प्रयासले अरूको अमूल्य जीवनको रक्षा हुन्छ, उनीहरूको आत्मिय जनहरूको मुहारमा मुस्कानसहित नयाँ जीवन प्राप्त हुने हुँदा रक्तदान सबै भन्दा ठूलो जीवनदान र मानवीय कर्तव्य हो,' समाजका अध्यक्ष विकास भुजेलको धारणा छ । उनले शुद्ध एक पिन्ट रगत दान गर्न सकेमा पुण्य मिल्ने विश्वास व्यक्त गरे ।
पहिलो पटक रक्तदान कार्यक्रमको आयोजना गर्न लागेको हुँदा कतारमा स्थापित वैचारिक संगठनका प्रमुख तथा प्रतिनिधि, सामुदायिक, सामाजिक, सांगीतिक संस्थाका प्रमुख तथा प्रतिनिधि, पत्रकार, कलाकारहरू सहित सम्पूर्ण नेपालीहरूलाई रक्तदानमा सरिक हुन् समाजले आग्रह गरेको छ । “भुजेल जातिको र विकास उन्नतिको आधार, सांस्कृतिक चेतना शिक्षा र रोजगार” भन्ने मूल नारा लिएर कतारमा सन्- २०१० मा स्थापना भएको भुजेल समाजले निरन्तर रूपमा यस्ता विभिन्न सामाजिक तथा परोपकारी कार्यहरू स्थापना कालदेखि नै गर्दै आइरहेको छ ।
रक्तदाताले रक्तदान गर्दा ध्यान दिनुपर्ने कुराहरू निम्न लिखित छन् :
१) रक्तदाता रक्तदान गर्न आउँदा आफ्नो कतारी आइडी वा लाइसेन्स वा हेल्थ कार्ड अनिवार्य हुनुपर्ने ।
२) रक्तदाता कतार प्रवेश गरेको ४ महिना पुरा भएको हुनुपर्नेछ ।
३) रक्तदाताले यदि पहिले रक्तदान गरेको भए २ महिना (६०दिन) पुरा भएको हुनुपर्नेछ ।
४) रक्तदाता कम्तीमा ८ घण्टा सुतेको कुनैपनी एन्टिबायोटिक औषधि सेवन नगरेको, पछिल्लो २४ घण्टा भित्र मदिरा सेवन नगरेको हुनुपर्नेछ ।
५) रक्तदाताको उमेर १८ देखि ६५ हुनुपर्नेछ र तौल कम्तीमा ५० केजी हुनुपर्नेछ ।
६) रक्तदाताको रक्तचाप र अन्य मापदण्ड रक्त सङ्कलन टोलीमा खटिएका स्वास्थ्यकर्मीबाट निर्धारण गरे बमोजिम हुनपर्नेछ ।
थप जानकारीका लागि
अध्यक्ष:- विकास भुजेल +९७४ ५०६६ ८८५१
महासचिव:- दुर्गा भुजेल +९७४ ३३७३ ८१६९
