सुर्खेत : राष्ट्रिय स्वतन्त्र पार्टी (रास्वपा)का प्रमुख सचेतक सन्तोष परियारले सिंगो राज्य लागेर पार्टी सभापति रवि लामिछानेलाई लखेट्न खोजेको आरोप लगाएका छन् ।
मंगलबार वीरेन्द्रनगरमा आयोजना गरिएको पत्रकार सम्मेलनमा बोल्दै उनले आफ्नो पार्टीलाई समाप्त पार्न सिंगो राज्यसत्ता नै लागेको आरोप लगाएका हुन् । सत्ताधारी दलले अनावश्यक विवादमा पारेर पार्टी नै सक्काउन खोजेको बताउँदै रास्वपालाई समाप्त गर्ने प्रयास परिवर्तनकारीहरूविरुद्ध रहेको उनको दाबी थियो ।
सचेतक परियारले दुई तिहाई सरकारले गरेको काममा आफुहरु असन्तुष्ट रहेको बताए । ‘दुई तिहाइको सरकार छ तर पनि काम गर्न नसकेर रनभुल्ल भएको छ,’ उनले भने, ‘सरकारले जनताको सेवा गर्न नाममा जनतालाई नै घाइते बनाएको छ ।’ सचेतक परियारले नेपालको आर्थिक अवस्था झनै कमजोर बन्दै गएको बताउँदै मुख्य राजनीतिक दलहरु नै रास्वपालाई सिध्याउन व्यस्त भएको बताए ।
उनले रवि लामिछानेको सांसद पद निलम्बन गर्नकै लागि सम्पति शुद्धीकरणको मुद्दा लगाएको आरोप लगाए । पुराना दल जनताको पार्टी बन्न नसक्दा रास्वपाको उदय भएको उनको दाबी थियो । ‘रास्वपाको उदयले पुराना राजनीतिक दलहरु डराएका छन् । त्यसैले रास्वपा नबने नयाँ पुस्तालाई समेत घाटा हुन्छ’ उनले भने, ‘रास्वपालाई ढाल्ने प्रयत्न भइरहेको छ । यदि रास्वपा सिद्दिएमा कैयौ वर्षसम्म नयाँ धार खडा हुने छैेनन्, त्यो सम्भव पनि छैन, यी पुरानै दलले जनतालाई ठगिरहने छन् । त्यसैले रास्वपा बनाउनमा नयाँ पुस्ताले साथ दिनुपर्छ ।’
पुराना राजनीति दल भ्रष्टाचार, घुसखोरी, नातावाद, कृपावादका फसेका भन्दै अब मुलुक निर्माणको जिम्मा रास्वपाले इमानदार र गम्भीर भएर लिन चाहेको उनले स्पष्ट पारे । साथै सचेतक परियारले अहिले सभापति लामिछानेसँग निरन्तर आफ्नो छलफल भइरहेको र अदातलमा मुद्दा चलिरहेका कारण कुनै पनि विषयमा नबोल्ने बताएको जानकारी दिए ।
