हेटौँडा : बागमती प्रदेशसभाको बैठक स्थगित भएको छ । सभामुखले अर्को सूचना जारी नगरुन्जेलसम्म बैठक स्थगित भएको सूचना जारी गरिएको छ । बागमती सरकारले प्रदेशसभाको हिउँदे अधिवेशन अन्त्यको सिफारिसमेत गरेको छ ।
बुधवार बसेकोे बैठकमा सरकारले हिउँदे अधिवेशन अन्त्यका लागि सिफारिस गर्ने निर्णय गरेसँगै अनिश्चितकालका लागि स्थगित गरिएको हो ।
बागमती प्रदेशका सचिव पूर्णबहादुर दर्जीले प्रदेशसभा नियमावली, २०७४ को नियम ६ को उपनियम २ बमोजिम सभामुखको अर्को सूचना नभएसम्मका लागि विशेष कारणले स्थगित गरिएको जानकारी दिए ।
मंगलवारका लागि बोलाइएको बैठक सत्तापक्ष र प्रतिपक्षबीच सहमति नहुँदा ४ बजेका लागि सारिएको थियो । ४ बजे पनि बैठक बस्ने वातावरण नबनेपछि सभामुखले बुधवार १ बजेका लागि बैठक आह्वान गरेका थिए ।
मंगलवार बसेको प्रदेशसभाका ७ दलको बैठकसमेत निष्कर्षविहीन बनेको थियो ।
सत्तापक्ष र प्रतिपक्षबीचको विगतको बजेटमाथिको सहमति र पछिल्लो समय भएको सहकारीमन्त्री मदुकुमार श्रेष्ठको स्वकीय सचिवको आत्महत्या प्रकरणमा छानबिन समिति गठनबारे सहमति जुट्न नसक्दा बैठक सहमतिविहीन बनेको थियो ।
बुधवारको बैठकमा पनि विपक्षी दल सहमतिमा नआउने स्थिति नदेखेपछिे मन्त्रिपरिषदबाट बुधवार राति ११ः५९ बाट संसदको अधिवेशन अन्त्य गर्नेगरी प्रदेश प्रमुख दीपकप्रसाद देवकोटासमक्ष सिफारिस गरिएको हो ।
अधिवेशन अन्त्य गर्ने सरकारको निर्णयलाई विपक्षी दलहरूले सरकारको दम्भ, घमण्ड र निरंकुशता उदाङ्गिएको आरोप लगाएका छन् ।
बुधवार पत्रकार सम्मेलन गर्दै विपक्षी दलहरू नेकपा (माओवादी केन्द्र), राप्रपा र नेकपा (एकीकृत समाजवादी)ले आफ्नो कमीकमजोरी र असफलता ढाकछोप गर्न संसद छलेको आरोप लगाएका हुन् ।
एकीकृत समाजवादी बागमती प्रदेश संसदीय दलका नेता कृष्ण शर्मा खनालले आफ्नो असफलता ढाकछोप गर्न सरकारले संसद छल्ने काम गरेको आरोप लगाए ।
‘बागमती प्रदेश सरकारको यस प्रकारको हर्कतले सरकार पूर्णतः असफल सावित भएको छ । आफ्नो कमीकमजोरी र असफलतालाई ढाकछोप गर्न संसद छल्ने कार्यले चाँडै हुने वर्षे अधिवेशनलाई समेत प्रभावित पार्नेछ,’ नेता खनालले भने, ‘बजेट अधिवेशनसमेत अनिश्चित दिशामा धकेलिने सम्भावना बढेको छ । दलहरूबीचको सहमति र सहकार्यबाट भाग्ने सरकारले नीति, कार्यक्रम र बजेटसमेत ल्याउने नैतिकता गुमाएकोले यस प्रकारको गैरजिम्मेवार हर्कत छोडेर वार्ता र सहमतिमार्फत अगाडि बढ्न हामी जोडदार माग गर्दछौँ ।’
प्रदेशसभामा प्रतिनिधित्व गर्ने सबैदलहरूको साझा एजेन्डालाई गम्भीरतापूर्वक कार्यान्वयन गर्नुको सट्टा आलटाल गर्ने र अलमल्याउने नीति सरकारको देखिएको माओवादी केन्द्र संसदीय दलका प्रमुख सचेतक रत्नप्रसाद ढकालको आरोप छ ।
उनले विगतका सहमति कार्यन्वयन गरी प्रदेशसभा संचालन गर्ने वातावरण बनाउन मंगलवार दिनभर वार्ता र संवादपश्चात बुधवार १ बजे बस्नेगरी सहमति हुँदाहुँदै बुधवार बिहान अधिवेशन अन्त्य गर्ने निर्णयले सरकार प्रदेशसभाबाट भागेर संसद छलेर गैरजिम्मेवार ढङ्गबाट प्रस्तुत भएको आरोप उनले लगाए ।
दलहरूबीच छलफल चलिरहँदा अधिवेशन अन्त्य गर्ने निर्णयले सरकारको अपरिपक्वता, केटाकेटीपनमात्र देखिएन ठूला दलहरू मिलेर बनेको सरकारको दम्भ, घमण्ड र निरंकुश शैलीसमेत उदाङ्गिएको उनको आरोप थियो ।
मंगलबार बसेको सर्वदलीय बैठकमा सरकार निकै गैरजिम्मेवार ढङ्गबाट प्रस्तुत हुँदा पनि विपक्षी दलहरू जिम्मेवार ढङ्गबाट लचिलो बनि वार्ता र छलफल भइरहँदा बुधवार बिहान प्रदेश सरकारको बैठक बसी चालू अधिवेशन अन्त्य गर्ने हठात् निर्णय गर्नुले कार्यपालिका र व्यवस्थापिकाबीचको दूरी बढाउने दिशामा सरकार उन्मुख देखिएको राप्रपा संसदीय दलका उपनेता गिरबहादुर तामाङले आरोप लगाए ।
उनीहरूले सरकारले यसैगरी पेलिरहे वर्षे अधिवेशनसमेत प्रभावित हुने उनीहरूले चेतावनी दिएका छन् ।
.jpg)
