सुर्खेत : गत माघ १७ गते जाजरकोट जुनीचाँदे गाउँपालिका–६ मइप बस्ने ३१ वर्षीय रामबहादुर शाही मृत अवस्थामा फेला परे । शाही जुनिचाँदे गाउँपालिका–५ स्थित शिवपुरी माध्यामिक विद्यालयमा भइरहेको राष्ट्रपति रनिङ शिल्ड प्रतियोगिता हेर्न गएका थिए ।
खेलकुद कार्यक्रम हेरेर फर्किने क्रममा काहाँरे खोलामा उनी मृत अवस्थामा भेटिएको थिए । मृत फेला परेपछि ईलाका प्रहरी कार्यालय गर्खाकोटबाट प्रहरी नायब निरीक्षक पूर्णबहादुर रानाको टोली घटनास्थल पुग्यो ।
घटनास्थल थप शंकास्पद देखिएपछि जिल्ला प्रहरी कार्यालय जाजरकोटबाट प्रहरी निरीक्षक दिनेश तिमिल्सिनाको कमान्डमा थप टोली खटिएको थियो । घटनास्थलमा रगतजस्तो देखिने रातो पदार्थ भेटिएको र उनको टाउको र कानमा चोट लागेको देखिएपछि प्रहरीले थप अनुसन्धान थाल्यो । घटनास्थलको अवस्था हेर्दा शाहीको कुटपिटबाट मृत्यु भएको भन्दै प्रहरीले १ महिला र ६ पुरुषसहित ७ जनालाई पक्राउ गरेर थप अनुसन्धान अगाडि बढायो ।
अनुसन्धानको क्रममा रामबहादुरको हत्यामा संलग्न भएको आरोपमा थप २ जना पक्राउ परे । प्रहरीले उनीहरुविरुद्ध जाजरकोट जिल्ला अदालतमा मुद्दा दायर गर्यो । रामबहादुरको हत्यामा संलग्न भएको आरोपमा सोही ठाउँका तुलाकुमारी शाही, बीरबहादुर शाही, जयबहादुर शाही, प्रेमबहादुर शाही, रत्नबहादुर शाही, मैसरा शाही, रेशमबहादुर शाही, रामबहादुर शाही र मइप १ नाबालकलाई पक्राउ गरेको थियो ।
प्रहरीले उनीहरुविरुद्ध फागन ११ गते अदालतमा कर्तव्य ज्यान मुद्दा दर्ता गरायो । अदालतले फागुन १३ गते थुनछेक बहसपछि पाँच जनालाई धरौटी र चार जनालाई कारागार चलान गरिसकेको छ ।
दुई लाख ५० हजारमा रत्न र एक लाख मैसराबाट धरौटी रकम माग गरेर अदालतले उनीहरुलाई छोड्न आदेश दिएको जाजरकोट जिल्ला अदालतका सूचना अधिकारी रामसिंह ठकुरीले जानकारी दिए । उनका अनुसार साधारण धरौटीमा रेशम, राम र मैप १ नाबालकलाई अदालतले छाड्ने आदेश दिएको थियो । थुनछेक बहसपछि पूर्पपक्षका लागि तुलाकुमारी, बीरबहादुर, जयबहादुर र प्रेमबहादुरलाई कारागार चलान गर्ने आदेश भएको सूचना अधिकारी ठकुरीको भनाइ छ । उनका अनुसार मुद्दा अहिले पनि अदालतमा चलिरहेको छ ।
चित्त नबुझेपछि उच्चमा
रामबहादुरकी श्रीमती निर्मलाले धरौटीमा अदालतले छाडेकोमा चित्त नबुझेको भन्दै छुटेकाहरुलाई थुनामा पठाइ पाउँ भन्दै उच्च अदालतमा निवेदन दर्ता गराएकी छन् ।
जिल्ला अदालतको आदेश चित्त नबुझेपछि धरौटी छुटेकाहरुलाई थुनामा राखी पाउँ भनेर ७३ नम्बर अन्तर्गत मुद्दा अहिले उच्चमा विचाराधिन रहेको उच्च अदालत सुर्खेतका प्रवक्ता प्रेमप्रकाश थापाले बताए ।
उनले दिएको निवेदन प्रक्रियामा रहेको र जिल्ला अदालतबाट कैफियत माग भइसकेकाले प्रक्रियागतमा गइसकेको प्रवक्ता थापाले बताए । दुवै पक्षलाई जानकारी दिनुपर्ने अदालती प्रक्रियाका कारण पेशी तोकेर थप प्रक्रिया अघि बढ्ने उनको भनाइ छ ।
आत्मदाहको प्रयास
धर्नामा बसेकी निर्मलाले बिहीबार एकाएक अदालत अगाडि आत्मदाह गर्ने प्रयास गरिन् । श्रीमानको हत्यारालाई कारवाहीको माग राख्दै पेट्रोल छर्केर आगो लगाउने प्रयास गरेपछि उनलाई प्रहरीले नियन्त्रणमा लियो । उनीसँगै उनकी बहिनी सर्मिला (सरा कुमारी) शाहीलाई पनि प्रहरीले नियन्त्रणमा लिएको जिल्ला प्रहरी कार्यालय सुर्खेतका प्रहरी उपरीक्षक रुपेश खड्काले जानकारी दिए ।
‘शान्तिपूर्ण रूपमा धर्नामा बसिराख्नु भएको थियो हिजो एक्कासी शर्मिला शाहीले पेट्रोल ल्याएर छर्केर आगो लगाउन खोजेपछि हामीले नियन्त्रणमा लिएका हौं,’ प्रहरी उपरीक्षक खड्काले मध्यान्हसँग भने, ‘आगो लगाउन खोज्ने शर्मिलालाई प्रहरीले नियन्त्रणमा लिएपछि धर्नामा बस्नु भएको उहाँको दिदीले आफू पनि प्रहरी कार्यालय जान्छु भनेपछि कार्यालयमा ल्याएका छौं ।’
