काठमाडौं : डा.सीके राउत नेतृत्वको जनमत पार्टीको राष्ट्रिय परिषद्को दोस्रो बैठक सम्पन्न भएको छ ।  काठमाडौं मध्यबानेश्वरमा राष्ट्रिय परिषद् अध्यक्ष तथा संगठन विभाग प्रमुख डा.जयकान्त राउतको अध्यक्षता तथा पार्टीका अध्यक्ष डा. सी. के. राउतको प्रमुख आतिथ्यतामा बैठक बसेको हो । 

देशमा पछिल्लो समयमा विकसित राजनीतिक घटनाक्रम, पार्टी एकिकरण, प्रशिक्षण, पार्टी संगठनको विस्तार तथा सुदृढीकरण, पार्टीको वर्तमान अवस्था र भावी रणनीति लगायतका समसामयिक प्रस्तावहरूमाथि छलफल गर्दै आठ वटा निर्णयहरु पारित गरेको छ । 

बैठकमा राष्ट्रिय परिषद्का सदस्यहरुले आ–आफ्नो धारणा राखेका थिए । हाल देशमा उत्पन्न राजनीतिक अन्यौलताको साथै राजनीतिक प्रतिगामी ध्रुवीकरणप्रति सचेत रहँदै अवको निकास र समग्र देशको विकासको लागि ‘नौलो गणतन्त्र’लाई जनजनमा फैलाउने र संघीय लोकतान्त्रिक गणतन्त्रको रक्षाको निम्ति संगठनलाई तयार राख्ने निर्णय गरेको छ ।

तीन–तीन महिनामा हरेक प्रतिनिधिसभा निर्वाचन क्षेत्रमा पालिका अध्यक्ष र वडाध्यक्षहरूलाई बोलाएर समन्वय बैठक राख्ने, निर्वाचन क्षेत्रकोलागि योजना तर्जुमा गर्ने र कार्यान्वयन भइरहेका योजनाहरू अनुगमन तथा दस्तावेजीकरण गर्ने, सदस्यता वितरण अभियान चलाउने, तल्लोदेखि माथिल्लो तहमा उम्मेदबार हुन सक्ने व्यक्तिहरूको पहिचान गरी पार्टी प्रवेश कार्यक्रमलाई तीव्रता दिने, पालिका र वडाहरूमा सांगठनिक प्रशिक्षण दिने, वडा/टोलका मुद्दाहरू, समस्याहरू, जनअपेक्षा पहिचान गर्ने, संगठनको स्थिति कहाँ कस्तो छ, घोषणापत्रमा समेटिनुपर्ने विषयहरू के–के हुन् आदिको सर्वेक्षण गर्ने र प्रतिवेदन तयार गर्ने जस्ता राष्ट्रिय परिषद्को अगामी कार्यदिशा हुनेकुरा पारित गरेको छ । 

परिषद् सदस्य अनिता साहले स्वागत मन्तव्य राखेको कार्यक्रमको सहजीकरण परिषद् सदस्य इ.हरेन्द्र चौधरीले गरेका थिए ।