काठमाडौं : १५ चैतमा काठमाडौंमा राजावादी समूहले शान्तिपूर्ण कार्यक्रम गर्ने भनेर अनुमति लिएको तर अराजकता मच्चाएको नेपाल प्रहरीका महानिरीक्षक दीपक थापाले बताएका छन् ।
प्रतिनिधिसभाअन्तर्गतको राज्यव्यवस्था तथा सुशासन समितिको शुक्रबारको बैठकमा महानिरीक्षक थापाले प्रदर्शनका नाममा ३०–४० जनाका झुण्ड बनाएर आगजनी र लुटपाट गरिएको जानकारी दिएका हुन् ।
शान्तिपूर्ण प्रदर्शन गर्ने भनेर अनुमति मागेपछि सोहीअनुसारको सुरक्षा रणनीति अपनाइएको जनाउँदै महानिरीक्षक थापाले तर कार्यक्रमको सुरुवातमै अराजकता मच्चाउन लागिएको बताए ।
‘शान्तिपूर्वक कार्यक्रम गर्छौं भनेर रुट र भेन्यू समेत लिएका थिए । समाजवादी मोर्चाको पनि कार्यक्रम रहेकाले कुनै पनि झडप नहोस् भनेर सुरक्षा रणनीति बनाइएको थियो,’ थापाले भने, ‘राजावादीको आन्दोलनमा सानासाना जुलुस निकालिए र मञ्च पनि बनाएको छ । त्यसअनुसार सुरक्षा दियौं । शान्तिपूर्वक गर्छौं भनेर गरिएको प्रदर्शन भीड, हिंसा, लुटपाट, तोडफोड, आगजनीमा उत्रियो । त्यसपछि हाम्रो रणनीतिअनुसार अगाडि बढ्न केही असहज भयो ।’
उक्त प्रदर्शनमा सुनियोजित रूपमा निश्चित संख्याका व्यक्तिहरूको समूह बनाएर लुटपाट र तोडफोड तथा आगजनी गरिएको थापाले बताए । ‘कार्यक्रम सुरु हुनु पहिले नै झडप भयो र मञ्चमा बसेर उत्तेजक भाषण पनि भइराखेको थियो । झुन्ड–झुन्ड थियो । ३०–४० जनाको झुन्ड भएर यहाँ हान, यहाँ हान भनिरहेका थिए । अराजक झुन्डमा गएर आगजनी, लुटपाट गरिएको छ ।’
घटनाको स्थिति ४ घण्टामा नियन्त्रणमा लिइएको पनि महानिरीक्षक थापाले दाबी गरे । कफ्र्यु लगाएर स्थिति नियन्त्रणमा लिइएको र तीनकुनेको घटनामा राज्यविरुद्धको अपराध र संगठित अपराध तथा आपराधिक उपद्रोमा मुद्दा दर्ता गरिएको थापाले जानकारी दिए । राज्यविरुद्धको अपराध र संगठित अपराधमा संलग्न भएका २० जनालाई पक्राउ गरिएको र अन्य ५८ जनालाई आपराधिक उपद्रोमा पक्राउ गरेर म्याद थप गरिएको थापाले जानकारी दिए । घटनामा संलग्नमा रहेकाहरूलाई अनुसन्धानको दायरामा ल्याइने पनि थापाले बताए ।
महानिरीक्षक थापाले राजावादीले तीनकुनेमा जलाएको घरको छतबाट अश्रुग्यास प्रहार नगरिएको स्पष्ट पारे । त्यसरी आगो लगाउनुको कारण उक्त घरको छतबाट प्रदर्शनकारीमाथि अश्रुग्यास प्रहार गरिनु र गोली प्रहार गरिनु रहेको दाबी गरिँदै आएको थियो । तर, थापाले उक्त घरबाट अश्रुग्यास प्रहार नगरिएको स्पष्ट पारे ।
‘तीनकुनेको घरबाट अश्रुग्यास प्रहार गरिएको छैन । अश्रुग्यास तलबाट माथि हान्ने हो । माथिबाट तल हान्ने होइन । घरमाथिबाट अश्रुग्यास हानिएको छैन । त्यस्तै मञ्चमा पनि अश्रुग्यास हानिएको छैन,’उनले बताए । दुर्गा प्रसाईंलाई खोज्नका लागि प्रहरी संयन्त्र सक्रिय रहेको पनि महानिरीक्षक थापाले जानकारी दिए ।
.jpeg)
