काठमाडौं : प्रतिनिधि सभाअन्तर्गतको राज्य व्यवस्था तथा सुशासन समितिले तीनकुने आसपासका क्षेत्रमा सभा, धर्ना, विरोध प्रदर्शनजस्ता कार्यक्रम गर्न अनुमति नदिन सरकारलाई निर्देशन दिएको छ ।
सिंहदरबारमा शुक्रबार बसेको समितिले १५ चैतमा भएको राजावादीको प्रदर्शनमा प्रत्यक्ष, अप्रत्यक्ष रूपमा संलग्न व्यक्तिलाई आवश्यक छानबिन गरी कानुनी कारबाही अघि बढाउन पनि निर्देशन दिएको छ ।
प्रधानमन्त्री तथा मन्त्रिपरिषद्को कार्यालय र गृह मन्त्रालयलाई दिइएको निर्देशनमा तीनकुने आसपासका क्षेत्रमा अब कुनै पनि प्रकारका सभा, विरोध प्रदर्शन, धर्ना, लगायतका कार्यक्रम गर्न अनुमति नदिन भनिएको छ ।
समिति सभापति रामहरि खतिवडाका अनुसार तीनकुने घटना निन्दनीय रहेकाले राजावादीहरूले विरोध प्रदर्शन गर्दा भएको घटनाको भत्र्सना गर्ने निर्णय पनि बैठकले गरेको छ ।
आगामी दिनमा यसप्रकारका हिंसात्मक घटना दोहोरिन नदिन एवं संविधान, कानुन एवं संघीय लोकतान्त्रिक गणतन्त्रात्मक राज्यको रक्षाको लागि गम्भीरताका साथ अघि बढ्न पनि सरकारलाई समितिले भनेको छ ।
समितिले नेपाल प्रहरी, सशस्त्र प्रहरी, लगायत सुरक्षा निकायलाई साधन श्रोत सम्पन्न बनाउन आवश्यक बजेटका लागि व्यवस्था गर्न नेपाल सरकार प्रधानमन्त्री तथा मन्त्रिपरिषद्को कार्यालय र गृह मन्त्रालयलाई निर्देशन दिएको छ ।
समितिले १५ चैतमा तीनकुने क्षेत्रमा राजावादीहरूले आयोजना गरेको प्रदर्शन हिंसात्मक हुँदा भएको जनधनको क्षतिबारे गृहमन्त्री रमेश लेखक, नेपाल प्रहरीका प्रहरी महानिरीक्षक दिपक थापा र सशस्त्र प्रहरीका महानिरीक्षक राजु अर्यालसँगको छलफल गरेको छ ।
बैठकमा बोलेको सबै सांसद्ले तीनकुने संवेशनशील रहेकाले त्यहाँ प्रदर्शन आयोजना दिनु प्रशासनको कमजोरी भएको भन्दै आलोचना गरेका थिए । त्रिभुवन अन्तर्राष्ट्रिय विमानस्थल, अति प्रज्ज्वलनशील इन्धन भण्डारण केन्द्र रहेको तथा तीनकुने नजिकै संसद् भवन, विभिन्न सञ्चारगृह रहेकाले पनि त्यस क्षेत्रमा सभा, धर्ना तथा प्रदर्शन आयोजना गर्न दिन नहुने सांसदहरूको भनाइ थियो ।
समिति सभापति रामहरि खतिवडाले तीनकुने आसपासका क्षेत्रमा सभा, धर्ना, विरोध प्रदर्शनजस्ता कार्यक्रम गर्न अब अनुमति नदिन सरकारलाई निर्देशन दिए ।
संसदीय समितिले आगामी दिनमा यस्ता खालका हिंसात्मक घटनाहरू दोहोरिनबाट रोक्न एवं संविधान, कानुन एवं संघीय लोकतान्त्रिक गणतन्त्रात्मक राज्यको रक्षाको लागि गम्भीरताका साथ अघि बढ्न पनि सरकारलाई निर्देशन दिएको छ ।
.jpeg)
