काठमाडौं : नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नयाँ वर्षमा नयाँ सरकार बन्ने दाबी गरेका छन् ।
गृह जिल्ला चितवनमा आइतबार पत्रकारहरूसँग कुरा गर्दै अध्यक्ष दाहालले नयाँ घटनाक्रमहरू विकसित भएको आफूले अनुभव गरिरहेको बताए ।
यो सरकार धेरै अगाडि जान सहज परिस्थिति नरहेको बताउँदै उनले सरकार फेरबदलको सम्भावना तीव्र रहेको पनि दाबी गरे । दाहालले सरकारतर्फ माओवादीको ध्यान नरहेपनि अहिलेको सरकार धेरै अगाडि जान सहज छैन भन्ने परिस्थितिले देखाएको बताए ।
उनले अहिलेको नयाँ अनुभवका आधारमा आफूले ठूलो दल कांग्रेसको नेतृत्वमा सरकार बन्नुपर्ने धारणा राखेको स्पष्ट पारे ।
वर्तमान सरकारप्रति जनआक्रोश बढेको र सरकारमा रहेका दलहरू पनि सडकमा आएकाले सरकारको भविष्य सुनिश्चित नरहेको अध्यक्ष दाहालको भनाइ छ ।
शिक्षक, डाक्टर, नर्स र राजनीतिक दलहरू समेत वर्तमान सरकारविरुद्ध सडक आन्दोलनमा उत्रिएको भन्दै दाहालले परिस्थिति निकै गम्भीर र पेचिलो बनेको विश्लेषण गरे । उनले चौतर्फी रूपमा सरकारप्रति असन्तुष्टि र आवेग देखिएको र त्यसको असर सडकमा देखिएकाले नयाँ वर्षले केही न केही निकास लिएर आउने उल्लेख गरे ।
उनले नयाँ वर्षले केही न केही निकास लिएर आउँछ भन्ने आफूलाई लागेको पनि बताए ।
अध्यक्ष दाहालले वर्ष २०८१को समीक्षा गर्द राजनीतिक घटनाक्रमका हिसाबले यो वर्ष औसत भएको टिप्पणी गरे । वर्ष २०८२मा राम्रो काम गर्न २०८१ सालले आधार भने दिएको उनको भनाइ छ ।
.png)
