
काठमाडौं : आकर्षक तलबको प्रलोभनमा पारी वैदेशिक रोजगारीमा बेलायत पठाइदिन्छु भन्दै ठगी गरेको अभियोगमा प्रहरीले एक जनालाई पक्राउ गरेको छ । काठमाडौं महानगरपालिका–१६ बस्ने नुवाकोट तार्केश्वर गाउँपालिका–१ घर भएकी ३६ वर्षीया कुमारी तामाङलाई पक्राउ गरिएको प्रहरीले बताएको छ ।
दुई जनालाई बेलायत पठाइदिन्छु भन्दै ७ लाख ९० हजार रुपैयाँ लिई सम्पर्कविहीन भएको उजुरीका आधारमा काठमाडौं उपत्यका अपराध अनुसन्धान कार्यालय टेकुले काठमाडौं महानगरपालिका–१२ बाट उनलाई पक्राउ गरेको हो ।
उनलाई वैदेशिक रोजगार ऐनअनुसार अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं पठाइएको छ । विभागका अनुसार उनलाई म्याद थप गरी पुर्पक्षका लागि थुनामा पठाइएको छ ।