– बलराम तिमिल्सिना
जब श्रीपेचलाई देखेपछि
शिर झुकायो र ढोग्यो
मेरो भनेको गणतन्त्रुले
एकाएक अचम्म भयो !
आफैप्रति आशंका भयो
जब सजिलै छिमेकीलाई चिन्यो
र हिन्दीमा सलाम गर्यो
अचम्मै अचम्म भयो !
म प्रसुती पनि भएकै हो
जन्माएकै हो बच्चा मैले
मेरो कोख साँक्षी छ
तर किन मिल्दैन बच्चाको डिएनए ?
बाऊको नमिलेको भए
भन्न सकिन्थ्यो तलमाथि पर्यो होला
यहाँ त आमासँगै मिलेन
क्या फसाद भयो, क्या अचम्म भयो !
यसरी दुःखद अचम्म भयो !
किन न्वारन गर्न कसिन्छ छिमेकी ?
किन मुख बिगार्छन् घर परिवार ?
किन मिल्दैन डिएनए बच्चाको ?
सायद प्रसब मुच्र्छनामा हुँदा म
कसैले साट्यो मेरो बच्चा
र राखिदियो कसैले अर्कै
र त यो बच्चा म जस्तै छैन ।
अर्कै मतिको छ, अगतिको छ !
कति माया गरेर बोलाउँथे म –
‘प्यारो गणतन्त्रु !’
ऊ माझी औंलो देखाउँथ्यो मलाई
गिज्याउँथ्यो÷होच्याउँथ्यो
लगातार यस्तो भएपछि
सरदर आमाले सोच्नै नसक्ने
यौटा भयानक निस्कर्षमा छु म –
यो बच्चा मेरो होइन
यो अरु नै कसैको बच्चा हो
खै मेरो गणतन्त्रु ?
यो श्रीपेच ढोग्ने असती
मेरो गणतन्त्रु हुन सक्दैन
एक सक्दैन
दुई सक्दैन
तीन सक्दैन
एउटी आमाको कठोर निष्कर्ष हो यो–
यो बच्चा मेरो होइन !
कतै म थाहै नपाई
सेरोगेट मदर त भइँन
यो बेमान बच्चाको ?
इतिहासले कति भद्दा मजाक गर्छ !
आई रियल्ली फिलिङ–
सेरोगेट मदर !
एम आई राइट ?
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies