पर्सा : पर्साको जिराभवानी गाउँपालिकामा बाघको आक्रमणबाट एक जनाको मृत्यु भएको छ । मृत्यु हुनेमा वडा नं.५ सखुवनियाका ६० वर्षीय तुलसी राउत थारुको मृत्यु भएको प्रहरीले जनाएको छ ।
थारु गाउँ नजिकैको जंगलमा शुक्रबार घाँस काट्न गएका थिए । सोही बेला बाघको आक्रमणमा उनको मृत्यु भएको इलाका प्रहरी कार्यालय पटेर्वासुगौलीका प्रहरी निरीक्षक मोहनजंग बुढाथापाले जानकारी दिए ।
दाहिने खुट्टा र बाँया हात बाघले खाएको अवस्थामा थारुको शव शनिबार बिहान फेला परेको प्रहरीले जनाएको छ । शुक्रबारदेखि बेपत्ता रहेका थारुको शव शनिबार बिहान सुगिभार नजिकको नर्सरीमा फेला परेको हो ।
शव फेला परेपछि स्थानीयले प्रहरीलाई खबर गरेका थिए । ईलाका प्रहरी कार्यालय पटेर्वासुगौलीका टोली घटनास्थलमा पुगेर शव पोष्टमार्टमका लागि वीरगञ्जस्थित नारायणी अस्पतालमा पठाएको छ ।
