पर्सा : अत्यधिक गर्मीको कारण पर्साका विभिन्न ठाउँका सामुदायिक विद्यालयहरुमा दर्जनौं छात्र, छात्राहरु बेहोस भएर ढलेका छन् । गर्मीले गर्दा जिल्लाको पोखरिया, वीरगञ्ज, पटेर्वासुगौली रंगपुरमा रहेको सामुदायिक विद्यालयहरुमा दर्जनौं छात्रछात्रा अत्याधिक गर्मीले बेहोस भएका छन् । त्यसमध्ये बेहोस हुनेमा बढी छात्रा रहेका छन् । पोखरिया नगरपालिका वडा नं ४ को   उच्चांगल रामदेव कलवार नमुना प्राविधिक विद्यालयका ८ जना विद्यार्थी गर्मीले बेहोस भएका छन् । 

सोमबार गर्मीका कारण छात्राहरु कक्षा कोठामा बेहोस भएको शिक्षक अनिल गिरीले बताए । कक्षा ७ र ९ का छात्राहरु बेहोस भएका हुन् । 

बेहोस छात्राहरुलाई पोखरिया अस्पतालमा उपचार गरिएको थियो । स्वास्थ्य अवस्था सामान्य भएपछि छात्राहरुलाई घर पठाइएको पोखरिया अस्पतालका मेडिकल सुपरिटेन्डेन्ट अनिल यादवले बताए । यस घटनाको मध्येनजर गरी पोखरिया नगरपालिका कार्यालयले नगरपालिका अन्तर्गत रहेका सम्पूर्ण विद्यालयहरु मंगलबारदेखि बिहान सत्रमा कक्षा सञ्चालन गर्न सूचना जारी गरेको छ । पोखरिया नगरपालिकाका प्रमुख प्रशासकीय अधिकृत अजय कुमार श्रीवास्तवले मौसमको अनुकूलता अनुसार मंगलबारदेखि शुक्रबारसम्म बिहान ६ बजेदेखि विद्यालय सञ्चालन गर्न सबैलाई सूचना जारी गरी जानकारी गराइएको बताए ।

त्यसैगरी वीरगञ्ज महानगरपालिकामा रहेको श्री सिदार्थ माध्यमिक विद्यालयमा आधा दर्जन छात्रा बेहोस भएका छन् । पटेर्वासुगौली गाउँपालिका रंगपुर माविका छात्रछात्राहरु पनि अत्यधिक गर्मीका कारण बेहोस भएका छन् । बेहोस भएका छात्रछात्राहरुलाई  विद्यालयका शिक्षकहरुले तत्काल स्वास्थ्य संस्थामा उपचारपछि घर फर्केका थिए ।  पर्सा जिल्लाका विद्यालय सञ्चालन गर्नको लागि बिहान ६ बजेदेखि सञ्चालन गर्न सूचना प्रकाशन गरी जानकारी गराएका छन् ।