भक्तपुर : कन्सोर्टियम नेपालको आयोजनामा भक्तपुरस्थित नगरकोटमा बाल अधिकार रक्षकसम्बन्धी तीनदिने राष्ट्रिय कार्यशाला सम्पन्न भएको छ । सातै प्रदेशका बाल प्रतिनिधिहरु सम्मिलित राष्ट्रिय बाल पैरवी परिषद्‍मा आवद्ध बाल मानव अधिकार रक्षकहरुको समूहको उपस्थितिमा उक्त कार्यशाला सम्पन्न भएको हो ।

कार्यशालाको सहजीकरणको नेतृत्व राष्ट्रिय बाल अधिकार परिषद्का पूर्वकार्यकारी निर्देशक मिलन धरेलले गरेका थिए भने कार्यशालामा अन्य बाल अधिकारकर्मी तथा अभियन्ताहरु र पूर्वबाल क्लब अभियन्ताहरुबाट पनि सहजीकारण भएको थियो ।

कार्यशालामा बालबालिका पनि मानव अधिकार रक्षक हुन सक्ने विषयमा चर्चा गरिएको थियो । छलफललाई थप गर्दै धरेलले मानव अधिकारको कार्यान्वयन गर्न कानूनी र नीतीगत सम्मान, प्रवर्द्धन र अनुगमनको विषयमा काम गर्नुपर्ने बताए । उपस्थित बालबालिकाले बाल मानव अधिकार रक्षकले पनि काम गर्ने क्षेत्र यही रहेको विषयमा जोड दिएका थिए ।

कार्यशालामा बाल मानव अधिकार भनेको के हो ? मानव अधिकार रक्षक को हुन सक्छन् ? बाल मानव अधिकार रक्षक को हुन सक्छन् ? बाल मानव अधिकार रक्षकहरुको भूमिका के-के हुन सक्छ ? जस्ता विषयहरुमा बृहत् छलफल गरिएको थियो । सो अवसरमा बाल मानव अधिकार रक्षकहरुको भेला आयोजना गरी बाल मानव अधिकार रक्षकहरुको तर्फबाट पैरवी कार्यलाई व्यापक बनाउने प्रतिबद्धतासमेत जनाइएको छ ।