काठमाडौं : चितवन, दैलेख र पाँचथरमा भएको सवारी दुर्घटनामा परेर ११ जनाएको मृत्यु भएको छ । ३२ जना घाइते भएका छन् । चितवनस्थित नारायणगढ–मुग्लिन सडकखण्ड अन्तर्गत सत्रकिलोमा भएको सवारी दुर्घटनामा परेर पाँच जनाको मृत्यु भएको छ ।
मुग्लिङबाट नारायणगढका लागि छुटेको बागमती प्रदेश ०६–००१ ज ०२९८ नम्बरको इलेक्ट्रिक हायस र नारायणगढबाट मुग्लिङका लागि छुटेको बागमती प्रदेश ०३–००१ ख २८१२ नम्बरको बस ठोक्किएर दुर्घटना भएको हो ।
उक्त दुर्घटनामा परेर मृत्यु हुनेमा गोरखाको आरुघाट गाउँपालिका–१ मान्बुका ४२ वर्षीय राजबहादुर गुरुङ र माइक्रोबस चालक चितवनको खैरहनी नगरपालिका–४ का ४० वर्षीय अनोज अधिकारी रहेका छन् ।
विनय त्रिवेणी गाउँपालिका–४ स्थित बगैँचाका ३५ वर्षीय सन्तोष भुसाल, सोही ठाउँकी ३३ वर्षीया सविना भुसाल र भारत घर भई पोखरामा किसाना पसल गर्दै आएका ३६ वर्षीय राजकुमार साहको पनि मृत्यु भएको छ ।
जिल्ला प्रहरी कार्यालय चितवनका प्रवक्ता डिएसपी भेषराज रिजालका अनुसार मृतक सबै माइक्रोबसमा सवार यात्रु हुन् ।
एक जना गम्भीर घाइते छन् । गम्भीर घाइतेको भरतपुरमा रहेको कलेज अफ मेडिकल साइन्सेस शिक्षण अस्पतालमा उपचार भइरहेको छ ।
अन्य चार जना घाइते भएका छन् । ति चार जना भने उपचारपछि डिस्चार्ज भएका छन् ।
चितवनमै शुक्रबार बोलेरोले साइकललाई ठक्कर दिँदा साइकलयात्रीको मृत्यु भएको छ । भरतपुर महानगरपालिका–५ स्थित नयन चोकमा शुक्रबार मध्यान्न १२ बजे ना४च ६९५१ नम्बरको बलेरोले साइकललाई ठक्कर दिँदा साइकल चालकको मृत्यु भएको हो ।
मृत्यु हुनेमा पर्सा सखुवापर्सौनी गाउँपालिका–४ घर भई हाल गैँडाकोट नगरपालिका–५ मा डेरा गरी बस्दै आएका १७ वर्षीय इशान अन्सारी रहेका छन् ।
शुक्रबार नै दैलेखमा यात्रुबहाक फोर्स गाडी दुर्घटना हुँदा चार जनाको मृत्यु भएको छ । २५ जना घाइते भएका छन् ।
शुक्रबार दिउँसो दैलेख बजारबाट सर्खेतका लागि छुटेको कर्णाली प्रदेश ०२००१ ख ०९९८ नम्बरको यात्रुबहाक फोर्स गाडी दुर्घटनामा परेको हो । सुर्खेत–दैलेख सीमाना वीरेन्द्रनगर–१४ रातानाङ्लानजिक फोर्स गाडी दुर्घटनामा पर्दा चार जनाको मृत्यु भएको हो ।
घाइतेहरुलाई उद्धार गरी एम्बुलेन्समा सुर्खेतस्थित कर्णाली प्रादेशिक अस्पताल पठाइएको छ । प्रहरीका अनुसार २९ जना यात्रु सवार थिए । उक्त गाडी झण्डै दुई सय मिटर तल खसेर दुर्घटनामा परेको हो ।
यस्तै, पाँचथरमा ट्रक दुर्घटना हुँदा एक जनाको मृत्यु भएको छ । ना४खा ७१२३ नम्बरको ट्रक ब्रेक फेल भई दुर्घटना हुँदा दुई जना घाइते भएका छन् ।
पाँचथरको मेची राजमार्गअन्तर्गत पाँचथरको हिलिहाङ गाउँपालिका–६ ढकाल गाउँमा दुर्घटना हुँदा पाँचथरकै हिलिहाङ–३ का ५७ वर्षीय भवानीशंकर पौडेलको मृत्यु भएको हो ।
दुर्घटनामा परेर ट्रक चालक इलामको सूर्योदय नगरपालिका–१२ का तेजबहादुर दास र ट्रक धनी झापाको बिर्तामोड नगरपालिका–१ चारपानेका राजकुमार बस्नेत घाइते भएका छन् ।
घाइतेको झापामा उपचार भइरहेको छ । ब्रेक फेल भई ट्रक करिब ५० मिटर तल झरेर दुर्घटनामा परेको प्रहरीले जनाएको छ । प्रहरीका अनुसार ट्रक काठका गोलिया लिएर फिदिम जाँदै गर्दा दुर्घटनामा परेको हो ।
.jpg)
