रौतहट : रौतहटको चन्द्रनिगाहपुरमा पोखराबाट जनकपुरतर्फ आउँदै गरेको यात्रुवाहक बस दुर्घटना हुँदा १२ जना घाइते भएका छन् ।आज बिहान पूर्वपश्चिम लोकमार्गअन्तर्गत चन्द्रपुर नगरपालिका-२ लचकानजिकै ग.१ ख.५८०७ नम्बरको बस बाटो काट्दै गरेको स्याललाई बचाउने क्रममा दुर्घटना भएको प्रहरीले जनाएको छ ।

रौतहटका प्रहरी प्रवक्ता डीएसपी दीपक रायका अनुसार बसमा २० यात्रु सवार रहेकोमा १२ जना घाइते भएका हुन् । बस चालक दोलखा सैलुङ गाउँपालिका ८ बस्ने ३५ वर्षीय पदम बहादुर बस्नेत र र सहचालक बाराको करैयामाई गाउँपालिका-७ बस्ने ३० वर्षीय सुरज पौडेललाई प्रहरी चोकी पौराहीको नियन्त्रणमा लिएर थप अनुसन्धान भइरहेको डीएसपी रायले जानकारी दिए ।

घाइतेहरुमध्ये एक जनाको अवस्था गम्भीर, तीन जनाको मध्यम र ८ जनाको सामान्य रहेको र उनीहरुको विभिन्न अस्पतालमा उपचार भइरहेको जिल्ला प्रहरी कार्यालय रौतहटले जनाएको छ ।