उदयपुर : उदयपुुरको त्रियुगा नगरपालिका आसपासका वडाहरुका विभिन्न ठाउँहरुमा हात्तीका हुल बथानहरु आएर बिगबीगी बढेसँगै बालीनाली, घरमा क्षति पुर्याएको छ ।
गत ३ दिनअघिदेखि नगरको ६ वडा अन्तर्गत लालपत्ता आसपास र सोमबार रातिदेखि जल्जले, ५ को देउरी,श्रीपुर, ४ को बगहा शान्तिटोल,९ को गैरुण,१३ को असारी तथा गाईघाट लगायत आसपासका ठाउँहरुमा हात्तीको बिगबीगी बढ्न थालेको हो ।
नगर आसपासका क्षेत्रमा हात्तीको ३ दर्जन बढी हुल बथानको बिगबीगी बढेसँगै गाउँबस्तीहरुमा आतंक मच्चाउनुका साथै घर धान तरकारी बालीनालीमा क्षति पुगेसँगै ज्यान जाने खतरा बढेको स्थानीयको भनाइ छ ।
नगरको ६ लाल्पता आसपासका ठाउँहरुमा तरकारी बालिनाली लगायत ठाउँहरुमा क्षति पुगेको वडाध्यक्ष योगेन्द्र दाहालले जानकारी दिए ।
त्यस्तै ५ को श्रीपुरमा मिन बहादुर बस्नेतको भान्सा घरमा क्षति पुर्याएको धान र केरा तथा ४ को बगहामा कृषक जीवन प्रसाद दाहालले २१ कठ्ठा खेतमा लगाइएको काटेर झार्नको लागि कुन्यू बनाएर राखेको धान सोमबार राती हात्तीले खाएर क्षति पुगेको जिल्ला प्रहरी कार्यालय उदयपुरले जनाएको छ ।
त्रियुगा ९ को गैरुन आसपासमा हात्तीको बथानले किसानले अनुमानित एक विघा खेतमा लगाएको धान नष्ट गरेको उजुरी पत्र वडामा आएको वडाध्यक्ष राजकुमार दनुवार जानकारी दिए । हात्तीको भगाउने क्रममा ३ जना मानिस घाइते भएको स्थानीयको भनाइ छ ।
