बझाङ : बझाङको तलकोट गाउँपालिका–२ धमेनामा जीप दुर्घटना हुँदा ३ जनाको मृत्यु भएको छ भने १ जना घाइते भएकी छन् । मृत्यु हुनेमा तलकोट गाउँपालिका–४ घर भएका ३६ वर्षीय बमबहादुर धामी, ७२ वर्षीया उनकी आमा जौमतीदेवी धामी र गाडी चालक केदारस्युँ गाउँपालिकाका ३२ वर्षीया शमशेर मल्ल रहेका छन् ।
त्यस्तै घाइते हुनेमा बम धामीकी ६ वर्षीय छोरी आकृति धामी रहेको जिल्ला प्रहरी कार्यालय बझाङका प्रमुख डीएसपी युवराज भण्डारीले जानकारी दिए । बिहीबार साँझ तलकोटबाट सदरमुकाम चैनपुर आउने क्रममा से १ ज ८४३ नम्बरको जीप तलकोट गाउँपालिका–२ धमेनामा दुर्घटना भएको प्रहरीको भनाइ छ ।
दुर्घटनाको कारण भने खुल्न नसकेको प्रहरीले बताएको छ । घाइते आकृतिलाई उपचारका लागि जिल्ला अस्पताल चैनपुर ल्याइएको छ ।
